COVALIMA, 07 juñu 2021 (TATOLI)—Partisipasaun feto iha pozisaun kargu xefia iha Munisípiu Covalima sei menus. Tanba ne’e, Francisco da Andrade nu’udar Administradór Munisípiu Covalima hato’o ona proposta ba Governu sentrál atu bele halo nomeasaun ba feto okupa kargu xefia-sira iha Covalima.
Notísia Relevante : FONGTIL “deskobre” mákina teste swab rua iha HR-Covalima avaria
“Ha’u hato’o ona proposta atu ami halo nomeiasaun feto-sira ba kargu xefia ka nivél diretora liu-liu iha administrasaun munisipál, nune’e bele iha balansu entre feto ho mane iha servisu administrasaun públiku,” Francisco de Andrade hateten ba Agência Tatoli iha Covalima, segunda ne’e.
Atualmente iha de’it feto na’in-rua maka okupa kargu xefia iha Administrasaun Munisípiu Covalima; na’in-ida nu’udar xefe departamentu no ida seluk hanesan Xefe Programa,
“Iha ha’u nia mandatu, ha’u sei fó prioridade no promove feto-sira iha hodi okupa kargu xefia iha nivel administrasaun munisipál nian,” Francisco De Andrade hateten.
Tuir dadus sensu tinan 2015 hatudu katak feto iha Munisípiu Covalima hamutuk 33.007 kompostu hosi postu administrativu Fatululik, Fohorem, Fatumea, Tilomar, Suai Vila, Maukatar, no Zumalai.
Jornalista : Celestina Teles
Editór : Francisco Simões
