DILI, 10 juñu 2021 (TATOLI)-–Ministériu Obra Públika (MOP) selebra karta aseitasaun ho empreza manan-na’in hamutuk 22, ba konkursu públiku estrada rurál ba dezenvolvimentu (ERD) iha munisípiu lima.
Empreza ne’ebé kompete ba konkursu públiku ne’e 100 resin, maibé liu selesaun no avaliasaun rigorozu hamutuk empreza 22, ba projetu estrada rurál iha munisípiu Ainaro, Baucau, Dili, Manatuto no Viqueque.
“Ohin ita asina karta aseitasaun ho empreza manan-na’in sira iha munisípiu lima, no la kleur tan bele asina kontratu atubele halo mobilizasaun no hahú ezekuta projetu estrada rurál ba dezenvolvimentu, liuliu manutensaun períodika no rutina,” Ministru Obra Públika, Salvador Eugênio Soares dos Reis Pires, hateten, hafoin selebra karta aseitasaun ho empereza sira, iha salaun Hotel Novo turismo, Lecidere, Dili, kinta ne’e.
Notísia relevante: MOP avalia ona dokumentu konkursu públiku estrada rurál munisípiu hitu
Orsamentu ba projetu estrada rurál iha munisípiu lima ne’e hamutuk millaun $8, ho durasaun tinan-ida, hahú hosi 2021 to’o 2022.
Iha tinan 2019, MOP kontrata ona enjeñeiru hamutuk 50 iha munisípiu sira atu halo supervizaun diária hodi garante kualidade obra.
“Ha’u husu ba empreza sira atu fó abilidade tomak durante implementasaun projetu ne’e ho kualidade, tanba investimentu ne’e uza povu nia osan, ne’ebé tenke kontribui hametin konetividade terrestre hodi fasilita ba dezenvolvimentu ekonómiku,” nia akresenta
Governante ne’e dehan, programa investimentu kapitál estrada rurál ne’e hosi Governu nia osan rasik no hetan apoia hosi Governu Austrália atu fó asisténsia téknika liuhosi International Labour Organization (ILO), ba formasaun planeamentu dezeñu no treinamentu ba traballadór no setór privadu iha área jestaun projetu.
“Orsamentasaun programa estrada rurál, halo reabilitasaun no manutesaun uza Governu nian osan no parseiru Governu Austrália fó apoia asisténsia téknika iha faze planeamentu no jestaun projetu sira,” nia hatutan.
Iha biban hanesan, Reprezentante Embaixadór Austrália iha Timor-Leste, Nick Cumpston, apresia Governu Timor-Leste nia susesu implementa projetu estrada rurál ba dezenvolvimentu.
“Ha’u hakarak kongratula Governu Timor-Leste liuhosi MOP, espesialmente Diresaun Nasionál Estrada, Ponte no Kontrolu Cheia (DNEPCC, sigla portugés), ba ninia kompromisu no servisu ba estrada rurál iha tinan 2021, hanesan susesu boot ida ba dezevolvimentu rede konesaun iha Timor-Letse,” nia afirma.
Hahú iha tinan 2012, Austrália fó apoiu ona asisténsia téknika liuhosi ILO ba Governu Timor-Leste liuhosi Ministériu Obra Públiku liliu DNEPCC atubele garante kualidade obra sira ne’ebé Governu rasik investe.
Orsamentu alokadu ba ERD munisípiu lima millaun $8
Nune’e mós, Diretór Jerál Administrasaun no Finansa hosi MOP, Januário Patrício Barbosa, informa, totál orsamentu estrada rurál hamutuk millaun $13, maibé falta munisípiu hitu mak sei halo avaliasaun finasiera no téknika no seidauk loke konkursu públiku tanba pandemia globál.
“Ita-nia kompañia manan-na’in hosi munisípiu lima hamutuk 22 ho orsamentu alokadu ba projetu estrada rurál ba dezenvolvimentu hamutuk millaun $8,” nia informa.
Iha orsamentu Jerál Estadu (OJE) 2021, Governu aloka millaun $49, ne’ebé millaun $35 mai hosi verba Fundu Infraestrutura no millaun $13 hosi liña ministeriál, atu halo reabilitasaun no manutesaun estrada rurál ho distánsia kilómetru 816.
Entretantu, Diretór kompañia, Rozi Construction, Rosa Maria Hornay, dehan, nia parte hetan projetu pakote rua ho distánsia kilómetru rua resin hosi suku Osoala to’o Loilubu, munisípiu Baucau ho kustu 600.000-resin.
“Karta aseitasaun ne’ebé ami asina atu fó resposabilidade ba ami implementa projetu tuir regra no garante kualidade atu kontribui ba dezenvolvimentu Timor-Leste,” nia garante.
Jornalista: Florêncio Miranda Ximenes
Editora: Julia Chatarina
