COVALIMA, 01 outubru 2021 (TATOLI)—Vise-Ministériu Edukasaun Juventude no Desportu, António Guterres enkoraja komunidade atu simu vasina hodi prevene moras COVID-19.
“Programa vasinasaun hanesan programa nasionál ida. Ita-boot sira hatene, ami-nia prezensa iha ne’e atu enkoraja ita-boot sira liu-liu husu komunidade Dato Tolu atu hakat ba sentru vasinasaun hodi simu vasina, nune’e it abele kombate COVID-19 iha Timor-Leste,” António Guterres hateten iha programa kampaña vasinasaun masionál ne’ebé hala’o iha suku Dato Tolu, Postu Administrativu Fohorem, munisípio Covalima, sesta ne’e.
Membru Governu nia prezensa iha komunidade nia leet ne’e, halo komunidade sente kontente ho sensibilizasaun kona-bá vasinasaun ne’e, nune’e sira promote ba governante ne’e atu mobiliza malu hodi bele hakat hakbesik ba sentru vasinasaun hodi bele simu vasina.
Governante ne’e husu ba komunidade labele fiar Informasaun falsa sira-ne’ebé espalla hosi ema sira-ne’ebé laiha responsabilidade, tanba informasaun ne’ebé sira fó sai ne’e laiha vantajen ba dezenvolvimentu nasionál.
“Ita tenke hatene. informasaun falsa ne’e ita-nia inimigu. Ita tenke rona informasaun kona-bá COVID-19 ne’e hosi fonte ne’ebè kredivel. Ita hotu tenke hamutuk hodi kombate Informasaun falsa ka hoax ne’e,” nia dehan.
Diretór Saúde Munisípiu Covalima, Filipe Pereira Lemos esplika, prezensa Vise-Ministru Edukasaun Juventude no Desportu hamutuk ho pesoal saúde atu enkoraja komunidade ne’ebè seidauk simu vasina, hodi hakbesik aan ba fasilidade saúde atu simu vasina.
“Ami konvida governante ne’e, tanba durante ne’e inan-aman sira seiduak iha konfiansa ba benefísiu hosi vasina ne’e rasik,” nia dehan.
Atu hadook-aan moras COVID-19 ne’e, nia husu ba komunidade tenke kumpre medida prevensaun hosi Organizasaun Mundial Saúde (OMS) no Ministériu Saúde hodi fase liman beibeik ho sabaun, uza máskara no distansiamentu sosiál.
“Laiha dalan seluk, ami kovida inan-aman sira hotu tenke kontribui hodi simu vasina, tanba simu vasina mak ita hotu bele livre hosi COVID-19 no belé la’o livre ba-mai,” nia dehan.
Jornalista : Celestina Teles
Editór : Cancio Ximenes
