AILEU, 19 outubru 2021 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Jerónimo, akompaña hosi Sekretáriu Estadu Terra no Propriedade (SETP), Mário Ximenes, halo lansansamentu vasina ba komunidade iha suku tolu, iha postu Aileu villa munisípiu Aileu.
Atividade ne’e realiza iha Merkadu Daisoli no partisipa hosi abitante sira hosi suku Fatubossa Lekitura no Lahae.
Iha biban ne’e, Ministru Francisco Jerónimo husu ba komunidade labele fiar lia falsu, ne’ebé dehan simu vasina bele habadak vida, no tau fiar ba Governu no parte Saúde, tanba úniku dalan atu prevene COVID-19 mak simu vasina.
“Husu ba inan-aman sira labele rona lia falsu, tanba daudaun ne’e iha territóriu laran kada munisípiu númeru vasina hahú sa’e inklui Aileu rasik atinje ona 59,1%, ne’e hatudu katak komunidade hahú voluntáriamente simu vasina, tanba ne’e atu atinje meta 80%, husu ita hotu nia kolaborasaun tanba laiha Governu ida mak hanoin a’at ba nia povu,” governante ne’e dehan iha ámbitu lansansamentu vasina.
Notísia relevante: PM orienta membru Governu hala’o kampaña vasinasaun iha territóriu nasionál
Ministru motiva komunidade atu partispa másimu iha kampaña vasina, nune’e bele hasa’e imunidade hasoru COVID-19.
Iha biban hanesan, Sekretáriu Estadu Terra no Propriedade, Mário Ximenes, konvida komunidade Aileu hotu atu partisipa vasina tanba iha novidade katak tinan oin Amu Papa Francisco sei halo vizita Timor-Leste.
“Hosi protokolu Vatikanu nian, fó informasaun katak ita-nia nasaun, partisipasaun komunidade iha vasina tenke atinje 80%, tanba ita maiória nu’udar katólika, tenke simu vasina, nune’e ita-nia Papa Francisco bele mai vizita Timor-Leste ba dala-rua hodi bele haree dezenvolvimentu nasaun,” nia hateten.
Iha fatin hanesan, Diretór Saúde munisípiu Aileu, Júlio dos Santos, hateten, alvu ba abitante suku tolu hanesan Fatubossa, Lekitura no Lahae hamutuk 7.000 mak sei simu vasina, maibé realidade foin abitante 4.000 mak foin simu vasina.
Nune’e, nia espera ho prezensa membru Governu, bele aumenta partisipasaun komunidade tanba membru Governu sira rasik tun halo sosializasaun vasina tanba hakarak komunidade bele moris ho saudávele no fila ba kondisaun normalidade.
Ba munisípiu Aileu, tuir previzaun abitante hamutuk 31.325 mak sei partisipa vasina, maibé daudaun ba vasina doze dahuluk no daruak, abitante hamutuk 20.000 mak foin simu vasina.
Abitante agradese prezensa membru Governu iha baze
Abitante, Inés da Reicureção, ne’ebé simu ona vasina doze dahuluk, hafoin rona esplikasaun hosi membru Governu, apresia no agradese ba esforsu Governu ne’ebé tuun to’o baze hodi halo sosializasaun kona-ba vantajen vasina, tanba komunidade iha área rurál menus informasaun.
“Ha’u rasik antes ne’e tauk tebes simu vasina, tanba informasaun espalla iha rede sosiál halo ami tauk loos, maibé ho prezensa membru Governu halo esplikasaun kle’an ba ami, bele motiva ami hodi kontribui ba rai ida-ne’e, liuliu ami hanesan negosiante bele livre lori sasán bá-mai munisípiu,” nia hateten.
Nune’e mós, Xefe suku Fatubossa, Mateus Xavier Mendonça, husu ba komunidade iha suku labele fiar lia falsu ne’ebé espalla iha rede sosiál hanesan Facebook, maibé fiar ba Governu no Saúde ne’ebé halo ona esforsu atu salva povu.
“Ha’u husu ba komunidade ne’ebé ohin partisipa iha lansansamentu vasina, ba oin tenke ajuda fali ita-nia maluk sira ne’ebé sei menus informasaun, tanba laiha Governu ida mai atu estraga ita-nia vida,” nia fó hanoin.
Jornalista : Arminda Fonseca
Editora : Julia Chatarina
