COVALIMA, 20 outubru 2021 (TATOLI)—Administradór Munisípiu Covalima, Francisco de Andrade, informa hosi janeiru to’o fulan ne’e Administrasaun Muunisípiu Covalima ezekuta Orsamentu Jeral Estadu (OJE) 2021 atinje ona 60%.
“OJE 2021 ne’e ita ezekuta ona 60%. Ida-ne’e seidauk sura ho kompromisu sira tinan 2021 nian iha projetu PIDM rua mak konstrui rezidénsia administradór no edifísiu postu administrative Covalima,” Francisco de Andrade informa ba Agência Tatoli, iha nia knaar fatin, kuarta ne’e.
Iha OJE 2021 ne’e, munisípiu Covalima ezekuta ba saláriu vensimemtu, bens servisu, kapitál menor, transférensia publika no kapital dezenvolvimentu.
Aleinde ne’e, OJE ne’e aloka ba Programa Dezenvolvimentu Integradu Munisipál (PDIM) kona-ba projetu foun konstrui edifísiu administrasaun postu administrativu Maucatar kompleta ho moru no tempu besik kompañia Sabudoi Unipesoal, Lda, sei halo konstrusaun ho orsamentu $179,438.
Nune’e mós, halo reabilitasaun rezidénsia administradór nian ne’e prosesu foin atu anunsia konkursu no agora sei prosesu hela Planta no Kadernu Enkargu (BoQ) no dezeñu ADN aprova ona, hein atu loke prosesu konkursu ho totál orsamentu $262,570.
Iha Livru orsamentu 3B (Munisípiu), Covalima tokon hamutuk $4,7 fahe ba saláriu vensimentu $2,84, bens servisu $1,105, kapitál menór $267, kapitál dezenvolvimentu $442, transaferénsia públiku $1,582.
Maske Prezidente Autoridade fó-sai katak, ezekusaun atinje ona 60%, maibé Agência TATOLI asesu hosi portál transferénsia Ministériu Finansa katak, hosi montante orsamentu ne’e kompromisu sira $511,279.95, obrigasaun sira $243,292.26, atuál $2,665,101.37, saldu hela $994,608.42 no ezekusaun atinje 65.9%.
Jornalista : Celestina Teles
Editór : Cancio Ximenes
