COVALIMA, 27 outubru 2021 (TATOLI)—Populasaun munisípiu Covalima orgullu tanba VIII Governu Konstitusionál lideradu Primeiru-Minsitru, Taur Matan Ruak, kuarte ne’e (27 outubru) marka istória dahuluk perfurasaun mina rai-maran iha Timor-Leste liu-liu perfurasaun ba mina posu Feto Kmaus iha munisípiu Covalima
Notísia Relevante: PM Taur lansa perfurasaun mina iha Covalima
“Ami kontente tanba ohin halo lansamentuu atu halo perfurasaun mina iha rai-maran posu Feto Kmaus, hodi kuda ba ita-nia bei’oan sira. Tanba, hanesan ita kuda Ai-Kamii, ohin loron la’ós lha kedas rezultadu maibé ita-nia bei’oan sira maka uza iha futuru,” abitante Laurindo Mendonça hateten ba Agência Tatoli, iha Aeroportu Internasionál Kay Lara Xanana Gusmão, Covalima.
Nia dehan, hafoin tinan 50 Timor Leste marka istória hodi halo perfurasaun mina iha rai-maran ne’ebè lokaliza iha Munisípiu Covalima.
“Maske halo perfurasuan mina iha Covalima maibe mina ne’e la’ós Covalima nian de’it. Mina ne’e ita hotu nian, nune’e bele halo dezenvolvimentu iha área rurál,” nia dehan.
Xefe Suku Suai Loro, Martinho Mendonça, agradese no iha esperansa ba VIII Governu Konstitusionál ne’ebé hala’o polítika hodi lansa perfurasaun mina iha rai-maran ne’ebè lokaliza iha munisípiu Covalima.
“Ami-nia esperansa, ohin, Primeiru-Ministru Taur Matan Ruak hala’o lansamentu ida ne’e atu halo perfurasaun hodi fó rezultadu ne’ebè mak di’ak no susesu,” Martinho hateten.
Ho lasamentu pergurasaun mina posu Feto Kmaus ne’e, joventude sira tenke prepara an no garante katak juventude sira bele iha ona kampu traballu no bele kompete iha kampu traballu nian.
Entretantu Xefe Suku Camnasa, Samuel Barros, hateten ohin halo ona lansamentuu maibé joven Covalima-oan sira-nia envolvimentu iha área perfurasaun ne’e mihis tebes.
“Nu’udar lideransa komunitária, ami halo kolaborasaun di’ak maibé realidade ami haree katak ema barak ne’ebé servisu iha perfurasan ne’e barak mak mai hosi munisípiu seluk no envolvimentu joven Covalima-oan ne’e mihis tebes,” nia dehan.
Samuel Barros mós hatutan, lansamentu atu halo perfurasaun mina benefísiu ba nasaun tenke konsidera joven siram nune’e joven sira bele muda sira-nia moris.
Lansamentu perfurasaun mina no gás ne’e, lansa hosi Primeiru-Ministru Taur Matan Ruak ne’ebé akompañadu hosi Ministru Petróleu no Minerál, Xefe Estadu Maior F-FDTL, Terenti Jenerál Lere Anan Timor no seluk tan.
Notísia Relevante: Timor-Leste marka istória dahuluk halo perfurasaun mina iha rai-maran
Jornalista : Celestina Teles
Editór : Cancio Ximenes
