DILI, 03 dezembru 2021 (TATOLI)–Diretór Operasaun Autoridade Inspesaun no Fiskalizasaun Atividade Ekonómika Sanitária Alimentár (AIFAESA), Gabriel da Costa, hateten, parte autoridade seidauk simu keixa ruma hosi komunidade relasiona ho folin sasán nesesidade bázika sa’e iha merkadu iha fulan ikus.
“Inspetór sira hosi AIFAESA departamentu operasaun liuhosi sesaun komérsiu, haree ona distributór iha loja no supermerkadu hodi kontrola folin. To’o agora ita seidauk simu keixa hosi komunidade katak folin sasán sa’e iha merkadu, bainhira sa’e la liu 10%, tuir dekretu-lei númeru 29/2011, kona-ba presu justu, ne’e normál, maibé bainhira liu persentajen ne’e krime, enkuantu fa’an produtu ho folin 5% ba kraik ne’e normál, tanba aumenta de’it $1 ka $2 hosi $10 ka $20,” Diretór Operasaun hateten ba Agência TATOLI, iha ninia knaar fatin, Matadoru, sesta ne’e.
Notísia relevante: Folin nesesidade bázika hahú sa’e iha merkadoria
Tuir Gabriel da Costa, daudaun ne’e folin sasán nesesidade bázika sira iha loja no supermerkadu sira aumenta oituan tanba impaktu hosi movimentu transportasaun ró ne’ebé lori sasán importasaun menus.
Enkuantu, kona-ba materiál konstrusaun folin iha merkadu aumenta maibé la liu 10%.
“Karik ita hetan operadór ekonómiua sira ne’ebé halo manipulasaun ba folin sasán sira, ne’e viola dekretu-lei kona-ba presu justu, entaun ita prosesu tuir lei, maibé durante ne’e ita seidauk deteta operadór ekonómiku ruma halo manipulasaun,” nia akresenta.
Nune’e, bazeia ba fiskalizasaun ne’ebé AIFAESA halo, rekolla folin sasán nesesidade bázika la liu 10% mak hanesan, foos globus kilograma 20 sosa $9,80, fa’an fali ho $10,50, manan lukru $0,70, foos globus kilograma 25 sosa $12,25, fa’an fali $12,50 no lukru $0,25, no foos globus kilograma 30 sosa $14,70, fa’an fali $15, no ninia lukru $0,30.
Trigu ho marka falkom kilograma 25 sosa $12, fa’an fali $13 no lukru $1, trigu ho marka Beruang Biru kilograma 25 sosa $12, faan fali $13,50, no hetan lukru $1,50.
Mina ho marka Bimoli litru lima sosa $6,50, fa’an fali $6,75 no hetan lukru $0,25, mina Bimoli litru rua sosa $3,17, fa’an fali $3,30 no hetan lukru $0,13 no mina ho marka Sanya litru lima sosa $7, fa’an fali $7,25, no lukru $0,25, inklui nesesidade bázika seluk.
Kona-ba produtu ne’ebé fulan-neen atu expira, parte AIFAESA labele halo apreensaun tuir dekretu-lei númeru 23/2009 05 agostu kona-ba produtu estragadu no liu prazu.
“Ne’ebé produtu sira fa’an iha supererkadu no loja sira mak ita haree data liu prazu iha fulan-neen mai kraik, ita la halo apreensaun, maibé fó atensaun de’it atu loja na’in sira fa’an produtu labele liu prazu. Ita halo apreensaun bainhira sira fa’an produtu ho data expira iha (03/11/2021) tuku 16:00, liu tia data ne’e sei fa’an mak ami bele halo apreensaun,” nia esplika.
Jornalista : Arminda Fonseca
Editora : Julia Chatarina
