DILI, 11 Maiu 2026 (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, hala’o enkontru ho líder nasionál sira hanesan Taur Matan Ruak, Francisco Guterres Lú-Olo, Lere Anan Timur no Filomeno Paixão, hodi ko’alia kona-ba konseitu komemorasaun Loron FALINTIL ba da-51 ne’ebé sei selebra iha 20 Agostu 2026.
Tenente Jenerál ne’e hatutan, nia mai hasoru eis tituláres aleinde sira mós hola parte ba Konsellu Superiór Militár nian, nune’e nia husu sira-nia opiniaun hodi halo konseitu ba komemorasaun loron FALINTIL iha loron 20 Agostu 2026.
“Komemorasaun loron FALINTIL ne’e halo kada tinan, nune’e konseitu ne’e ita halo diferensa ho sira seluk, kona-ba diferensa iha prátika mak imi haree,” Tenente Jenerál F-FDTL ne’e informa ba jornalista sira iha rezidénsia eis titulár Taur Matan Ruak, Faról, ohin.
Nune’e, nia dehan, konseitu diferensa mak durante ne’e nia nunka mai hasoru eis titulár sira, hanesan uluk luta hamutuk maibé agora di’ak ona tanba hotu-hotu fahe malu husi família no podér.
“Entaun, aleinde ami ko’alia kona-ba servisu nian, ami mós mai koversa hamutuk konta istória sira-ne’ebé akontese iha pasadu,” nia dehan.
Jornalista : Alexandra da Costa
Editór : Cancio Ximenes
