DILI, 23 dezembru 2021 (TATOLI)–Ministru Asuntu Parlamentár no Komunikasaun Sosiál, (MAPKOMS), Francisco Martins da Costa Pereira Jerónimo, hato’o mensajen santu natál no tinan-foun ba timor-oan hotu.
“Besik daudaun tama ba loron natál, hodi hau-nia naran no funsionáriu hotu ne’ebé haknaar-an iha MAPKOMS, hakarak hato’o votu santu natál, dame no ksolok ba timor-oan hotu no uma-kain ida-idak ne’ebé namkari lemorai iha Timór laran no mos rai-li’ur,” Ministru Francisco hateten iha ninia Gabinete, Palásiu Governu, kinta ne’e.
Nia dehan, atu tama ba loron boot, Timor-Leste hasoru dezafiu hanesan kalimidade ne’ebé estraga infraestrutura no COVID-19 ne’ebé afeta ba saúde públika.
“Situasaun sira ne’e mak Estadu hasoru no perturba serbisu balun ho ligasaun atendimentu públiku liuhosi ita idaidak ninia profisaun, maski nune’e serbisu barak mak ita halo hamutuk ona iha tinan 2021 nia laran,” nia akresenta.
Iha biban espesiál ne’e, MAPKOMS hato’o votu natál, dame no ksolok ba funsionáriu hotu ne’ebé tutela ba ministériu ne’e hanesan mídia estatál, Rádiu Televizaun Timor-Leste, Empreza Públika (RTTL, E.P) no TATOLI-Agência Noticiosa de Timor-Leste, Institutu Públiku (Agência TATOLI, I.P), mídia privada, estasaun rádiu komunidade, sentru informasaun komunitária inklui parseiru iha serbisu komunikasaun sosiál iha nasionál no internasionál
“Hein katak mensajen dame no esperansa natál nian bele leno ita hotu, nune’e tama tinan foun 2022 bele iha espíritu no dispozisan foun hodi hasoru dazafiu foun ne’ebé aprezenta mai ita ida-idak. Ha’u-nia votu santu natál no tinan foun kmanek mai ita hotu,” nia dehan.
Jornalista : Arminda Fonseca
Editora : Julia Chatarina
