DILI, 03 fevereiru 2022 (TATOLI)–Ministériu Ensinu Superiór Siénsia no Kultura (MESSK) seidauk bele públika rezultadu avaliasaun ba kursu 25 hosi instituisaun hitu, ne’ebé Ajénsia Nasionál Avaliasaun Akreditasaun Akadémiku (ANAAA) aprezenta tanba sei hein hela rekomendasaun hosi instituisaun ensinu superiór sira.
Tuir Ministru Ensinu Superiór Siénsia no Kultura, Longuinhos dos Santos, ministériu seidauk bele publika tanba sei haruka fali ba Instituisaun Ensinu Superiór ida-idak atu haree relatóriu karik iha rekomendasaun ruma molok halo publikasaun.
“Ha’u simu ona relatóriu hosi Diretór Ezekutivu ANAAA, kona-ba rezultadu avaliasaun ba kursu 25 ne’e, maibé ha’u seidauk bele relata ba públiku tanba ne’e segredu,” Ministru Longuinhos dos Santos, hateten iha Kampus UNTL, kinta ne’e.
Notísia relevante: Avaliasaun kursu 25 iha universidade hitu seidauk publika
Tinan uluk ajénsia ne’e halo avaliasaun ba kursu 25 hosi instituisaun hitu, ho rezultadu hosi avaliasaun aprezenta ona ba Konsellu Diretivu iha loron 17 dezembru 2021, tanba ne’e semana dahuluk janeiru 2022 aprezenta ona ba instituisaun sira.
“Ami fó semana rua ba sira atu hato’o reklamasaun, maibé realidade sira laiha reklamasaun ne’ebé iha tempu besik, másimu segunda hanesan ne’e ami halo ona pedidu ba Ministru Ensinu Superiór Siénsia no Kultura no halo ona aprovasaun finál molok halo publikasaun iha Jornál Repúblika,” nia akresenta.
Maski Ministru Longuinhos konsidera relatóriu ne’e segredu hela, maibé Reitór UNTL relata ona katak kursu ne’ebé universidade submete ba akreditasaun tinan ne’e pasa hotu.
UNTL iha kursu neen ne’ebé hetan avaliasaun no reavaliasaun hosi ANAAA, ne’ebé lima hetan C no ida hetan B maka kursu Komunikasaun Sosiál.
“Ami espera bele hadi’a liután kondisaun atu halo akreditasaun sira tuir mai bele hasa’e liután grau ba sira ne’ebé hetan C bele hetan B no ita tenta másimu bele to’o A,” nia tenik.
Kursu 25 ne’ebé hetan avaliasaun no re-avaliasaun hosi ANAAA, kompostu hosi kursu neen hanesan kursu edukasaun fízika no desportu iha Fakuldade Edukasaun Arte umanidade (FEAH) ne’e reavalia fali kursu lima seluk mak hanesan Relasaun Internasionál, Komunikasaun Sosiál, Lian Tetun, Farmásia no Kursu Nutrisaun.
Nune’e mós, iha Universidade Oriental (UNITAL), ajénsia ne’e halo avaliasaun ba kursu tolu iha Instituisaun Superiór Cristal (ESC) no kursu ida iha Dili Institute Technology (DIT).
Jornalista : Tomé Amado
Editora : Julia Chatarina
