VIQUEQUE, 19 marsu 2022 (TATOLI)—Ohin loron sidadaun sira uza direitu votu hodi eleje Kandidatu Prezidente Repúblika (PR) ba períodu 2022-2027.
Hanesan mós komunidade iha suku Uaitame, postu administrativu Uatulari, munisípiu Viqueque, ne’ebé fó ona votu, iha espetativa Xefe Estadu foun bele kria kondisaun di’ak ba dezenvolvimentu rai-laran no povu nia moris.
“Ha’u sente ukun rasik-am ne’e hanesan folin liberdade ba ema hotu hodi ezerse diretu votu, nune’e determina futuru ba tinan-lima oin mai, maibé ha’u husu karik ida hosi kandidatu na’in-16 mak eleitu, tenki hadi’a povu-nia moris,” Abitante suku Uaitame, Domingos Gaspar, hateten ba Agência TATOLI, hafoin vota iha sentru votasaun iha suku Uaitame, sábadu ne’e.
Notísia relevante: CNE-STAE loke pakote materiál Eleisaun Prezidensiál perante reprezentante Kandidatu PR
Nia mós husu, Prezidente Repúblika foun tenke serví povu ho di’ak no laran luak, no iha esperansa tau-matan mós ba kbiit laek sira.
“Kandidatura ne’ebé manán mós ita hotu nian, lakon mós ita hotu nian,” nia akresenta.
Iha fatin hanesan, Abitante suku hanesan, Mateus Ricardo, konsidera eleisaun hanesan oportunidade di’ak tanba fó liberdade ba sidadaun hodi hili ukun-na’in ne’ebé di’ak.
“Ha’u kontente tanba ohin ita bele ezerse diretu votasaun hodi hili kandidatura ba períodu 2022-2027. Ha’u-nia esperansa karik kandidatu ida sai vensedór tenke dezenvolve nasaun ba oin. Kandidatura sé de’it maka manán ka lakon, ne’e hanesan lala’ok demokrásia ne’ebé tenke odese hodi simu realidade,” nia tenik.
Nune’e mós, Abitante, Candido da Silva, hateten, kandidatura ne’ebé eleitu tenki serbisu hamutuk ho órgaun soberanu Parlamentu Nasionál, Tribunál no Govenu hodi lori implementa programa ne’ebé fó benefísiu ba povu no nasaun.
“Kandidatu na’in-ida ne’ebé eleitu tenki kria pás no establidade iha nasaun no povu labele terus tan. Manán ka lakon tenke kolabora hamutuk hodi dezenvolve nasaun, mai ha’u kandidatura na’in-16 di’ak hotu,” Candido da Silva subliña.
Abitante, Abílio Caniso, konsidera Prezidente Repúblika ne’ebé di’ak tenki tau-matan ba povu-nia moris tanba durante ne’e povu hasoru terus tanba dezenvolvimentu ne’ebé la’o neneik hanesan estrada.
Xefe suku Uaitame, José do Rosário, husu kandidatura eleitu iha kapasidade hamutuk ho Governu haree ba infraestrutura bázika hanesan estrada no bee-moos, ne’ebé iha povu barak mak seidauk asesu.
“Ha’u hanesan Autoridade lokál hakarak husu kandidatura na’in-16, ida ne’ebé eleitu ba Prezidente Repúblika tenki haree povu nian terus,” nia hato’o.
Nune’e, nia husu populasaun suku Uaitame hodi mantein kalma hodi hein rezultadu eleisaun.
“Iha ámbitu eleisaun ne’e, ha’u husu populasaun hodi kria pás no establidade iha ita-nia suku laran hodi hein rezultadu votasaun,” nia akresenta.
Populasaun hamutuk 900 iha suku Uaitame mak partisipa iha Eleisaun Prezidensiál 2022.
Atividade votasaun iha sentru votasaun suku Uaitame la’o hakmatek, ne’ebé hetan observasaun hosi ofisiál Kandidatu PR na’in-16, ofisiál supervizaun Komisaun Nasionál Eleisaun (CNE, sigla portugés), Brigada Sekretariadu Tékniku Administrasaun Leitorál (STAE) no hetan seguransa másima hosi Polísia Nasionál Timor-Leste (PNTL).
Atividade eleitorál hahú tuku 07:00 to’o 15:00 no hafoin ne’e sei halo kedan kontajen votu.
Suku Uaitame estabelese sentru votasaun rua, ho totál eleitór hamutuk 900.
Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 reprezenta 51% no feto 28.746 reprezenta 49%.
Munisípiu Viqueque estabelese ona sentru votasaun hamutuk 92 no estasaun votu 110 iha postu lima.
Jornalista : Vitorino Lopes da Costa
Editora : Julia Chatarina
