BAUCAU, 09 abril 2022 (TATOLI)–Koordenadór Movimentu Dinamiza munisípiu Baucau, Adérito Domin no Veteranu Alin Laek, husu Baucau-oan fó votu ba Kandidatu Prezidente Repúblika (PR) hosi Partidu Congresso Nacional de Reconstrução de Timor (CNRT) períodu 2022-2027, José Ramos Horta.
“Ha’u mai partisipa iha kampaña kandidatu númeru 01, hanesan apoia movimentu reprezentante 21, hakarak afirma tan hodi lori Ramos Horta sai Prezidente Repúblika. Ita tenki ko’alia interese nasionál, labele ko’alia hakarak buka poder de’it,” Adérito Domin hato’o deklarasaun iha ámbitu kampaña segunda volta ho tipu mini-kampaña Kandidatu PR Horta, iha Triloka, munisípiu Baucau, sábadu ne’e.
Notísia relevante: Xanana husu partidu aliadu serbisu maka’as lori vitória ba Horta
Domin husu futuru Xefe Estadu atu tau a’as interese nasionál tanba kestaun ne’e importante ba povu no nasaun.
“Labele ko’alia poder tanba eleisaun parlamentár seidauk tempu, tenke ko’alia interese nasionál, entaun Baucau-oan hotu tenki hili Ramos Horta,” nia akresenta.
Responsável Movimentu ne’e apela ba apoiante Baucau-oan sira katak labele fiar deklarasaun polítika kona-ba arte marsiál.
“Informasaun balun espalla katak bainhira Ramos Horta eleitu nu’udar Prezidente Repúblika atu taka arte marsiál ne’e la loos, tanba hanoin ida-ne’e ha’u mós labele mai hambrik hodi apoia ba nia (Horta), maibé nia sai Prezidente atu hadi’a grupu arte-marsiál hotu,” Domin deklara.
Notísia relevante: Horta sei la taka atividade arte-marsiál bainhira eleitu sai PR
Iha fatin hanesan, Veteranu Baucau, Alin Laek, konsidera Horta iha kapasidade hodi lidera nasaun no iha relasaun internasionál di’ak.
“Ha’u ema kiak, tanba ne’e mak ha’u hamutuk ho ema kiak hodi apoia CNRT nia kandidatu. Ha’u husu ba Baucau-oan sira ita fó votu ba Ramos Horta,” nia tenik.
Apoiante hosi Baucau, Ermelindo dos Santos Freitas, konsidera kandidatu númeru 01 hanesan ema ida kualifikadu.
“Ramos Horta iha hanoin di’ak no matenek tanba hasai kursu iha rai-li’ur no iha koñesimentu luan, tanba ne’e maka nia merese sai Prezidente Repúblika,” Ermelindo dehan.
Ermelindo sujere, bainhira eleitu sai PR tenki haree ba povu-nia moris, liliu estrada sira nune’e bele fasilita populasaun agrikultór sira lori produtu ba fa’an iha merkadu hodi sustenta família.
“Karik sai duni Prezidente Repúblika ami povu-nia interese maka dezenvolvimentu iha ita-nia rai, liliu saúde, edukasaun no bee-moos, tanba sira ne’e liga direta ho povu-nia moris, ami garante ne’e maka ami sei fó votu ba Horta,” nia espera.
Iha ámbitu ne’e, juventude Frente Revolucionária do Timor-Leste Independenten (FRETILIN) na’in-10 resin hosi postu administrativu Venilale, munisípiu Baucau deside afilia ba partidu CNRT, ne’ebé simu hosi Prezidente Partidu CNRT, Xanana Gusmão.
Durante diálogu hetan supervizaun hosi Komisaun Nasionál Eleisaun (CNE, sigla portugés), observadór internasionál no hetan seguransa hosi Polísia Nasionál Timor-Leste (PNTL).
Antes ne’e, iha Eleisaun Prezidensiál 2022 primeira ronda ho rezultadu, Kandidatu PR hosi Partidu FRETILIN, Francisco Guterres ‘Lú Olo’ lidera iha munisípiu Baucau ho votu 27.463 (40,15%) no Ramos Horta ho tótal votu 15.898 (23,25%), hosi totál eleitór 71.137 ne’ebé fó votu ba kandidatu na’in-16 iha rejiaun ne’e.
Jornalista : Antónia Gusmão
Editora : Julia Chatarina
