DILI, 13 abríl 2022 (TATOLI)— Kandidatu Prezidente Repúblika períodu 2022 too 2027, ho númeru sorteiu 2, Francisco Guterres Lú-Olo, hateten bainhira povu fó konfiasa atu eleitu ba Prezidente Repúblika mak koopera ho ezekutivu sira hodi fortifika FALINTIL Forsa Defeza Timor-Leste (F-FDTL) hodi asegura rikusoin iha tasi Timór.
“Ha’u hanoin ita iha forsa armada, karik reeleitu ba Prezidente Repúblika hanesan komandante suprému forsa armada nian, buka hodi fortifika ita nian forsa armada liuliu Komponente Navál hodi asegura ita nian tasi oinsa proteje rikusoin iha tasi ho di’ak liu,” Kandidatu Lú-Olo hateten iha ámbitu debate kandidatu Prezidente Repúblika ne’ebé hala’o iha salaun Mahoka Osindo, kuarta kalan ne’e.
Tanba ne’e, Lú-Olo dehan reeleitu ba Xefe Estadu nafatin ko’alia ho Governu atu hala’o investimentu diak liután liuliu fasilidade no ekipamentu Forsa Armada liuliu Komponente Navál atu sira bele kontrolu Tasi Timor ho seguru.
Tuir observasaun Jornalista Agência TATOLI nota katak iha sesaun ikus ba debate kandidatu Prezidente Republika entre númeru sorteiu 1, José Ramos Horta no ho númeru sorteiu 2, Francisco Guterres Lú Olo hatudu valór amizade ba públiku.
Tanba iha sesaun ikus, Moderadór ba debate kandidatu Prezidente Repúblika, Padre Bento Barros Pereirra, konvida kandidatu na’in-rua atu kaer liman hodi hatudu valór amizade, maske iha palku polítiku defende ida-idak nian prinsípiu polítika.
Debate kandidatura PR ba segunda volta iha situasaun armónia no pás nia laran, maske antes ne’e kandidatu nain-rua ko’alia ho konvisaun diferente.
Notisia relevante: Eleitu ba PR, Horta prefere estabelese akordu tripartida asegura rikusoin tasi
Jornalista: Natalino Costa
Editór : Florencio Miranda Ximenes
