DILI, 22 abril 2022 (TATOLI)–Primeiru-Ministru (PM), Taur Matan Ruak, bolu Ministru Transporte no Komunikasaun (MTK), José Agustinho da Silva, hodi ko’alia kestaun semáforu (lampu merah) balun iha sidade Dili ne’ebé a’at no seidauk halo manutensaun.
“Foin daudaun tékniku sira hadi’a ona semáforu iha Ministériu Justisa oin no funsiona ona, iha parte dirasaun Aitarak-laran liga bá Palásiu Prezidente Repúblika ne’e trafu mak lakon. Tanba ne’e maka atu halo manutensaun, parte ministériu publika konkursu dala hira ona tuir regra aprovizionamentu maibé seidauk iha ema mak interese. Parese kala valór la to’o maka ema la interese,” Ministru informa ba jornalista sira hafoin hasoru Xefe Governu iha Rezidénsia Ofisiál Farol, sesta ne’e.
Notísia relevante: DNTT sei halo manutensaun ba semáforu iha kapitál Dili
Maski nune’e, governante ne’e promete sei solusiona problema ne’e hodi bele normaliza hikas semáforu sira ne’ebé la funsiona.
“Sei buka solusaun ba ida-ne’e, karik iha empreza balun interese, bele adjudika maibé tenki justifika tuir rejime jurídiku aprovizionamentu nian,” nia nia akresenta.
Daudaun semáforu iha Dili iha fatin haat mak avaria hanesan iha Palásiu Prezidensiál, Vila Verde iha área Katedrál, Eis ANZ iha área Lecidere no Hospital Nacional Guido Valadares Bidau Toko Baru.
Tuir dadus hosi Diresaun Nasionál Transporte Terrestre (DNTT), semáforu iha Dili laran hamutuk 12, kompostu hosi Bidau Lecidere, Estádiu, Ministériu Justisa, Eletricidade de Timor Leste, Empreza Públika (EDTL, E.P), Colmera, Katedrál, jardín 05 de maio, Palásiu Prezidensiál, Timor Plaza, Delta, Bidau Tokoh Baru no Bemori.
Jornalista : Antónia Gusmão
Editora : Julia Chatarina
