MS-KFP asina karta aseitasaun ho profisionál saúde 24

DILI, 30 maiu 2022 (TATOLI)— Ministériu Saúde ho Komisaun Funsaun Públika (KFP), segunda ne’e, realiza serimónia asinatura termu aseitasaun ba rekrutamentu públiku profisionál saúde iha área Médiku Jerál Juniór no Médiku Dentista Juniór hodi bele fó atedimentu ba pasiente sira iha munisípiu.

Husi total 24 funsionáriu foun ne’ebé simu pose kompostu husi médiku jerál Junior ema na’in-16, médiku dentista junior na’in-8. Profisionál saúde foun hirak ne’e sei prienxe ba fasilidade saúde hirak ne’ebé sira konkorre, maiória mak konkorre ba iha postu saúde sira.

Biban ne’e, Ministra Saúde, Odete Maria Freitas Belo, hateten ho termu aseitasaun ba profisionál saúde atu bele mellora atedimentu saúde ba sidadaun sira tanba rekoñese durante ne’e profisionál saúde iha territóriu nasionál seidauk sufisiente hodi atende pasiente sira ne’ebé moras.

Ministra Saúde, Odete Maria Freitas Belo akompaña husi Prezidente Komisaun Funsaun Públiku Faustino Cardoso Gomes hala’o serimónia asinatura termu aseitasaun ba rekrutamentu públiku profisionál saúde iha área médiku jerál junior no médiku dentista junior. Imajen/Media MS

“Ohin halo ona serimónia termu aseitasaun ba profisionál saúde hamutuk 24 hosi médiku jerál juniór no médiku dentista junior. Maibé ita nia rekursu umanu kontinua la sufisiente iha ita-nia rain hodi fó atendimentu lais ba sidadaun sira ne’ebé moras,” Ministra Saúde hateten ba jornalista sira hafoin serimónia ne’e iha salaun palasiu Sinzas, Caicoli.

Polítika Ministériu Saúde katak fó prioridade ba infraestutura liuliu harii postu saúde ida iha kada suku ne’ebé kompleta ho rekursu umanu, maibé seidauk too tarjetu, nune’e kontinua esforsu atu kumpre kompromisu ne’e.

Tanba, VIII Governu Konstitusionál hakarak lori hakbesik saúde ba sidadun hodi hetan atedimentu médiku ho lais atu bele moris ho saudavél.

“Dala ida tan ita sai testemunña ba komprimisu boot husi VIII Governu Konstitusionál atu haforsa Funsaun Públika ne’ebé bele serve di’ak liu Estadu no povu rai doben ida-ne’e liuliu iha setor saúde,” Deklara Ministra Saúde.

MS kontinua hala’o esforsu boot hodi re-organiza, renova no inova servisu nasionál saúde ho objetivu atu hadi’a di’ak liutan prestasaun kuidadu saúde primária no ospitalár ho kualidade ba populasaun. Alende ne’e buka maneira tekniku, material no finanseiru hodi hadi’a asesu asisténsia saúde iha komunidade liuliu ba maluk sira-ne’ebé hela iha área remota.

“Maibé atualmente iha suku balun no postu balun ami-nia pakote ida hateten katak presiza iha médiku ida, Enfermeiru ida, parteira ida, tékniku aliadu ida no saúde publika ida atu iha kada postu saúde tenke iha pesoál saúde na’in-neen, maibé ita haree ita nia rekursu umanu la sufisiente ba ida ne’e,” nia informa.

Tanba ne’e, Ministra Odete husu ba pesoál saúde hirak ne’e asina ona termu aseitasaun atu utiliza matenek no sentidu dedikasaun umanu hodi promove prinsípiu no valór dentolojiku ho konduta profisionál no kontribui ba esforsu ne’ebé MS halo hodi promove konfiansa husi utente no família iha servisu nasionál saúde nian.

Governante ne’e, esperansa katak profisionál saúde sira simu ona pose ne’e bele aproveita oportunidade ida ne’e hodi sai referénsia di’ak liután ba iha futuru hodi lori servisu nasionál saúde Timor-Leste ho di’ak liután.

Iha fatin hanesan, Prezidente Komisaun Funsaun Públika (KFP), Faustino Cardoso, hateten servisu hamutuk iha prosesu ida ne’e mak sai save ba susesu ba atendimentu saúde ba sidadaun sira hodi moris ho saudavél.

“Ami fasilita meiu oin-oin oinsá atu viabiliza prosesu rekrutamentu ne’e la’o ho efisiensia no efikasia tanba prosesu ne’e la’o ho transparante sein iha intervensaun husi líder polítika ka superiór másimu sira. Tanba ne’e husu ba empozada no empozadu atu servisu fuan ho laran hodi serbí pasiente sira ho di’ak,” Prezidente KFP ne’e informa.

Profisional saude sira lee hela juramentu termu aseitasaun.Imajen/Media MS.

Profisionál Saúde ne’ebé asina karta aseitasaun mak hanesan Médiku Jerál Juniór mak João Cristo sei hala’o servisu postu saúde Faturasa-Aileu, Francisca de Orleans Pereira iha postu saúde Hatubelico-Ainaro Merita da Silva Oliveira iha postu saúde Marobo-Bobonaro, Julito Correia do Santos iha postu saúde Leber-Bobonaro , Deonizia Terezinha iha postu saúde Samalari-Baucau, Lidia Pereira iha postu saúde Uaioli-Baucau, Evarsito da Silva iha postu saúde Bedasi-Suai,

Nune’e mós, Claudina Ximenes iha postu saúde Usu-bemasu-Ataúro, Tolentino Amaral Brites iha postu saúde Laubono-Ermera, Nelson Afonso iha postu saúde Hatugau-Ermera, Leão José Agostu postu saúde Baduro-Lautem, Dirce Maria Auxiliadora iha postu saúde Ekapu-Liquiça, Mateus da Costa iha postu saúde Hohorai- Manatuto, Liliana Natalia do Santos iha postu saúde Datina- Manufahi, Lino Soares iha postu saúde Luca Wetodu- Viqueque, Roberto Pereira Gusmão iha postu saúde Bahatata- Viqueque.

Entretantu, Médiku Jerál Dentista Juniór kompostu hosi Santina da Conseição hala’o servisu iha Hospitál Referral Maubessi, Nelia Alexandre do Santos iha Ospitál Referral Maliana, Maria Novelia iha Ospitál Referal Maliana, Nomeia Anes iha Ospitál referral Suai, Edio do Santos Ospitál Referál Suai, Romaldo das Neves iha Opsitál Rejional Eduardo Ximenes Baucau, Lucia de Jesus iha Ospitál Rejional Eduardo Ximenes Baucau no Longuinhos da Cunha iha Sentru Saude Internamentu Ermera.

Tuir dadus hosi Diresaun Rekursu Umanu iha Ministériu Saúde hatudu katak desde restaurasaun indepedénsia too agora forsa traballu saúde hamutuk 6.000-resin kompostu hosi rejime jerál hamutuk 1.000-resin no rejime espesiál hamutuk 4.000-resin.

Iha rejime espesiál kompostu hosi médiku espesialista hamutuk 60-resin, médiku jerál 900-resin, parteira 700-resin, tékniku aliadu 800 resin no Enfermeiru 1.000-resin.

Jornalista : Felicidade Ximenes

Editór : Florencio Miranda Ximenes