COVALIMA, INKLUZAUN SOSIÁL

Vítima inundasaun uma-kain tolu iha Covalima evakua ona ba sentru evakuasaun

Vítima inundasaun uma-kain tolu iha Covalima evakua ona ba sentru evakuasaun

Inundasaun akontese iha aldeia Lo’o, suku Suai Loro, postu administrative Suai, Munisípiu Covalima, iha sesta (30 juñu 2022). Imajen Tatoli/Celestina Teles.

COVALIMA, 30 juñu 2022 (TATOLI)–Udan boot ne’ebé akontese durante loron haat haat no  iha sesta (30/6) ne’e hamosu inundasaun ne’ebé afeta ba vítima inundasaun uma kain-tolu iha aldeia Lo’o, suku Suai Loro, postu administrativu Suai Vila evakua ona ba sentru evakuasaun salaun Eskola Sukundaria Jeral Públika.

Vítima inundasaun Ana de Jesus hateten, sente triste tanba sasán uma laran la konsege salva   tanba mota lori hotu sasán uma laran, animal, estraga natar no toos, nune’e nia parte lori de’it roupa iha isin-lolon no dokumentu importante sira.

“Ami sente triste ami-nia sasán uitoan mós ami la hasai. Sasán ne’ebé iha, ami-nia isin-lolon ho ami-nia dokumentu sira-de’it. Maske tinan-tinan sempre akontese inundasaun, ami la sai hosi ami-nia fatin maibé tinan ne’e mak mota boot halo ami husik aminia hela fatin,” Ana de Jesus hateten ba jornalista sira, iha salaun EGP, kinta ne’e.

Vítima inundasaun ne’e mós husu ba Governu atu fó apoiu ai-han no roupa tanba sasán barak mak la salva no mota boot hamosu inundasaun hodi afeta ba komunidade nia moris.

“Ami hato’o ba Governu atu fó apoiu ai-han ba ami tanba mota boot hamosu inundasaun halo ami husik hela ami-nia hela fatin no sasán uma laran ami labele salva,” nia dehan.

Hafoin evakua vítima afetadu inundasaun, ekipa hosi servisu munisípál risku jestaun dezastre naturál hamutuk ho Cruz Vermela Timor Leste (CVTL), Protesaun Sivil, Mercy Corps, Servisu Saúde Munisipiu Covalima, Bombeiros fó apoiu emerjénsia ba vitima sira.

Apoiu emerjénsia sira mak hanesan manta sanulu (10), aqua dos (2), biskuit Vales lata ida (1) no  biti lima (5) no seluk tan.

“ohin ami evakua vítima uma-kain tolu ho totál familia na’in-10. Agora apoiu sasán sira ohin kalan sira atu uza toba iha ne’e mak agora manta sanulu (10), be água dos rua (2), biskuit vales lata ida (1) ho biti lima (5),” Tékniku operasionál Risku Desastre Naturál, Mário Gomes, hateten.

Apoiu emejénsia ne’e hosi protesaun sivil nian no CVTL sei iha posibilidade apoiu tanba aban ba oin mak sei foti dadus, no ohin nafatin kontinua halo evakuasaun ne’e no sei iha posibilidade sei uza nafatin salaun ne’e.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!