DILI, 14 jullu 2022 (TATOLI)– Governu Kuba liuhosi ninian Enkarregadu Negósiu Embaixada Kuba iha Timor-Leste, José Ernesto Pires, kinta ne’e, hala’o audénsia ho Sekretáriu Estadu Juventude no Desportu (SEJD), Abrão Saldanha, hodi reafirma kompromisu hodi ajuda Timor-Leste iha área edukasaun no desportu.
“Kuba ho Timor-Leste iha kooperasaun ne’ebé metin liu iha área Saúde, maibé ami hakarak reafirma hodi alarga liután iha área edukasaun no desportu,” Enkarregadu Negósiu Embaixada Kuba iha Timor-Leste, José Ernesto Pires, hateten ba Agência TATOLI iha edifisiu SEJD-Lecidere, kinta ne’e.
Notísia relevante:Loro Horta rekomenda embaixadór foun Kuba prioritiza saúde no edukasaun
Iha setór edukasaun, nia dehan foku liu apoia Departamentu Edukasaun Fíziku no Desportu iha Universidade Nasionál Timor-Lorosa’e (UNTL), atubele prodús rekursu umanu ka profesór, hodi hanorin fali eskola iha territóriu nasionál.
“Ita hakarak produs rekursu umanu ka profesór sira atu hanorin matéria edukasaun fíziku, desportu no saúde ijiene ba alunu sira iha territóriu nasionál,” nia garante.
Alende ne’e, Diplomata Kubanu ne’e mós kompromete kontinua kooperasaun iha área setór saúde nian, liuliu fó bolsa estuda ba timoroan atu hasai kurdu lisensiatura no masteradu iha área médiku.
Tuir dadus, Timoroan hamutuk 1.018 mak hetan bolsa estudu ba Kuba iha área medisina jerál, médiku jerál no médiku espesialista.
Notísia relevante:Kuba komprometidu tulun SEKoop dezenvolve kooperativa iha Timor-Leste
Jornalista: Hortencio Sanchez
Editór : Florencio Miranda Ximenes
