Governu planeia loke estrada metru 18 husi Rotunda Elemloi to’o rate ain
DILI, 08 Abríl 2026 (TATOLI)—Ekipa konjunta kompostu husi Sekretaria Estadu Asuntu Toponímia Organizasaun Urbana (SEATOU) hamutuk ho Ministériu Obra Públika (MOP), no Autoridade munisipál, Kuarta ne’e, halo diálogu ho komunidade afetadu alargamentu estrada iha Aldeia Lesbutak, Suku Manleuana, Postu Administrativu Dom Aleixo, Munisípiu Dili.
Diálogu ne’e tanba Governu iha ona planu iha tempu badak sei loke estrada husi Rotunda Elemloi to’o rate ain, ho totál luan metru 18.
“Ita loke estrada husi Elemloi nia sa’e mai Eskola Canossa to’o iha rate ain ne’e metru hamutuk 18, ne’e ba lampu iluminasaun, trotoár no veleta tanba kuandu ita-nia foho bee tun mai to’o estrada nakonu. Nune’e, ita fó tempu ba sira to’o 15 Juñu atu hamamuk fatin, entaun hahú ohin ba oin idaidak prepara nia sasán ona,” Sekretáriu Estadu hateten ba Jornalista sira hafoin halo diálogu ho komunidade afetadu.
Governante ne’e dehan, diálogu ne’e kontinua de’it husi tinan kotuk ne’ebé antes ne’e ekipa konjunta halo ona ba komunidade. Orisehik ekipa mosu halo levantamentu dadus maibé konsege mosu dezentendimentu ho komunidade.
“Ohin ne’e halo diálogu ida para reforsa dezeñu ne’ebé Governu prepara ona no hein hodi implementa. Dezeñu ne’e ita la asegura membru Governu sira no halo vítima ba povu, ne’e lae. Maibé iha diálogu ne’e komunidade barak mak la simu no konkorda ho dezeñu ne’e, tanba sira-nia direitu, sira sente afetadu ba uma no sasán maibé nafatin kolabora no koopera para halo dezenvolvimentu ba rai ida-ne’e no ba jerasaun sira tuir mai,” nia akresenta.
Notísia relevante : MOP indemniza ona afetadu 1.305 ba alargamentu estrada
Bainhira ekipa téknika sira foti ona dadus ohin, maka ba oin serbisu alargamentu estrada hahú la’o.
Iha fatin hanesan, Xefe Suku Manleuana, Jacob Soares Tilman, apela ba komunidade atu prepara no kolabora ho Governu atubele oferese dadus.
“Imi prepara dadus para ekipa, hatudu dadus ba sira tanba ha’u haree ne’e komunidade barak hahú halo ona deklarasaun rai. Tanba iha área Manleuana ne’e iha rai Estadu, eransa no privada,” nia katak.
Enkuantu, Afetadu alargamentu estrada Manleuana, Evangelino Soares Amaral, preokupa tanba ekipa SEATOU lori dezeñu mai la hanesan ho kompromisu iha tinan kotuk.
“Ha’u nu’udar rai-na’in, povu iha rai ne’e, ha’u sente triste liu maibé hanesan povu ko’alia to’o iha ne’ebé lei nafatin iha ita-nia leten, entaun kolabora maibé tanba ami laiha poder. Tanba iha tinan kotuk sira mai promete dehan estrada sei halai husi morru Canossa mai to’o rate ain, maibé ohin loron dezeñu mai oin seluk,” nia lamenta.
Nia rekomenda ba ekipa téknika atubele halo loos dezeñu estrada ne’ebé kleuk para iha espasu naton ba sira.
“Ohin ne’e ita diskute ka halo diálogu ne’e atu buka solusaun, maibé ekipa mai nafatin mantein dezeñu ne’ebé iha. Bele muda oituan para fó ami espasu. Nune’e rohan kona sinál no sorin bele halo uma. Ne’ebé ami konkorda de’it tanba ami iha presaun nia laran,” nia tenik.
Evangelino Soares dehan, husi morru Canossa mai to’o rate ain ne’e família kuaze 30 ona mak sei afeta ba alargamentu estrada ne’e.
Jornalista : Osória Marques
Editora : Julia Chatarina
