iklan

NASIONÁL, HEADLINE, KAPITÁL

R4D apoia ekipamentu IT no eskritóriu ba MOP

R4D apoia ekipamentu IT no eskritóriu ba MOP

Adjuntu R4D, Nívio Magalhães. Imajen Tatoli/Egas Cristóvão

DILI, 22 jullu 2022 (TATOLI)Rural Road for Development-Support (R4D) apoia ekipamentu Informasaun no Teknolojia (IT) no ekipamentu eskritóriu ba Diresaun Jerál Obra Públiku, Ministériu Obra Públiku (MOP).

Adjuntu R4D, Nívio Magalhães, hateten, apoiu ne’e tanba antes ne’e ekipa R4D halo vizita haleu munisípiu hotu hodi haree kondisaun no fasilidade.

“Ami haree hotu fasilidade sira iha munisípiu no ami deside hodi fó apoiu ba supervizór sira iha munisípiu, tékniku laboratóriu no mós ofisiál komunitáriu, ne’ebé daudaun destaka iha munisípiu sira, nune’e mós atu hadi’a liután komunikasaun entre funsionáriu iha munisípiu no nasionál. Aleinde ne’e fasilita sira-nia serbisu iha ami-nia parte asisténsia téknika, ami mós atu asegura programa ne’e nia sustentabilidade ba oin, karik ami husik hela,” Adjuntu R4D hateten, iha ámbitu serimónia entrega ekipamentu, iha JL Vila, Fatuhada, sesta ne’e.

Notísia relevante: R4D-ILO iha inisiativa forma enjeñeiru junior iha Viqueque

Ekipamentu ne’ebé oferese hanesan laptop hamutuk 48, printer A3 hamutuk 11, router 11, mouse 48, WiFi internet gratuita durante fulan-neen, meza haat no kadeira haat ba eskritóriu, kadeira vizitante haat, kuadru ida, bookcase ida, no armáriu tau livru ida.

Durante vizita ba munisípiu, preokupasaun ne’ebé hetan barak liu mak relasaun ho internet, tanba ne’e maka sei monta internet durante fulan-neen no.

“Hahú semana oin, ekipa ida hosi ami sei ba munisípiu hodi fó formasaun ba funsionáriu sira,” nia akresenta.

Iha fatin hanesan, Diretór Jerál MOP, Rui Hernani, husu ba responsável sira atu tau atensaun atu halo manutensaun rutina ba ekipamentu sira.

“Agradese tebes ba R4D tanba apoia ona ekipamentu, tinan hirak liubá MOP halo rekrutamentu ba funsionáriu hodi koloka ba munisípiu maibé ekipamentu laiha. Tanba ne’e maka ho apoiu ne’e ajuda tebes funsionáriu destakadu sira,” nia tenik.

Responsável ne’e husu ba funsionáriu sira atu utiliza fasilidade sira ne’e ho di’ak no kuidadu hodi halo serbisu.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!