DILI, 26 jullu 2022 (TATOLI)–Selebrante Padre Carlito da Costa Araújo, husu ba servisu nain sira iha Agência Notisioza Timor-Leste -Tatoli, Institutu Públiku, tenke sai saseluk ba sosiedade hodi haklaken lialoos ba públiku liuhosi divulga informasaun ho kredivel, justu no loloos.
Amu-lulik hato’o mensajen ne’e iha nia omília bainhira prezide misa agradesimentu iha Igreja Parókia Motael, ba selebrasaun ezisténsia Agência Tatoli ba dala-VI ne’ebé monu iha loron 27 fulan-jullu.
Notísia relevante: PPN enkoraja Agência TATOLI kombate “HOAX” liuhosi fó informasaun ho loloos
“Ha’u hato’o parabéns ba Agência Tatoli, ne’ebé mak selebra aniversáriu ba dala-neen. Ho imi-nia ezisténsia ba dala-neen, atu uza imi-nia koñesimentu hodi sai nafatin saseluk ba sosiedade no povu Timor-Leste ho informasaun loloos,” nia hateten iha omília, kuarta ne’e.
Amu selebrante ne’e mós dezafia jornalista sira hosi Tatoli atu barani tama iha kualkér konflitu hodi defende lialoos liuhosi informasaun krítika no investigativu tuir faktu, liuliu violénsia ne’ebé viola ema-nia direitu.
Mundu ohin loron tama ona iha era moderna, nune’e amu-lulik ne’e husu ba jornalsita sira atu idak-idak ajusta koñesimentu liuhosi siénsia ne’ebé hetan hodi fornese informasaun loloos ba públiku tuir faktu no realidade ne’ebé akontese iha sosiedade.
Tanba ko’alia kona-bá koñesimentu no siénsia sai fatór determinante ne’ebé hakarak ka lakohi hotu tenke iha, liuliu jornalista sira.
“Ho aniversáriu Tatoli nian ne’e atu orienta ita atu nafatin defende konseitu liberdade imprensa nian, ba buat ne’ebé loos, buat-ne’ebé loos nunka bele lakon, maske lialoos sempre hetan obstákulu, tanba ne’e profeta Izaias hanorin mai ita atu ko’alia buat-ne’ebé mak loos, informasaun ne’ebé kredivel, ita hato’o buat-ne’ebé mak ita bele defende,” padre ne’e apela.
Biban ne’e, Prezidente Konsellu Diretivu Agência Tatoli, Manuel Pinto, agradese ba padre selebrante tanba disponibliza tempu hodi prezide misa agradesimentu ba selebrasaun Tatoli ba dala-neen.
“Misa ida-ne’e atu hasa’e símbolu agradesimentu ba Nai Maromak, tanba ho Nai-nia bensa no grasa mak ohin ajénsia Tatoli eziste durante tinan neen ona, tuir nia misaun no vizaun hodi halo serbisu ne’ebé mak hatuur iha prinsípiu,” nia katak.
Prezidente Tatoli ne’e mós agradese ba vise-prezidente na’in-rua, kompostu hosi Vise Prezidente Asuntu Midia no Jornalístika, Xisto Freitas Piedade no Vise-Pezidente Asuntu Administrasaun no Finansa, Oladino da Costa, no fiskál úniku ne’ebé durante ne’e sempre motiva no akompaña, monitoriza ezekusaun planu no programa Tatoli nian.
Manuel Pinto husu ba jornalista no funsionáriu sira atu serbisu ho responsablidade no profisionál, tanba ezisténsia ba dala-neen nu’udar ema ida karik, foin hatene la’o no ba eskola.
“Ita hahú iha mudansa, ne’ebé mudansa sira-ne’e labele mantein iha-ne’e, nafatin halo serbisu ba iha buat-ne’ebé seidauk halo di’ak, kontinua hadi’a, kontinua mós halo buat-ne’ebé ita seidauk halo, liuliu refleta ba ita-nia misaun no vizaun,” Prezidente Konsellu Agência Tatoli ne’e fó hanoin.
Misa ne’e partisipa hosi Vise Prezidente Asuntu Mídia no Jornalístika, Xisto Freitas Piedade, Vise Prezidente Asuntu Administrasaun no Finansa, Oladino da Costa no funsionáriu sira hotu.
Koru iha selebrasaun misa ne’e dirije hosi Foin Sa’e Katólika (FOSCA, sigla portugés), Parókia Aimutin, Dili.
Notísia relevante:PR Horta enkoraja TATOLI kontinua públika informasaun loos ba públiku
Jornalista : Sérgio da Cruz
Editór : Evaristo Soares Martins
