iklan

EKONOMIA, BOBONARO, HEADLINE, MUNISÍPIU

Traballadór konsidera PMOPA motiva joven badinas serbisu

Traballadór konsidera PMOPA motiva joven badinas serbisu

Traballadór aldeia Laktil, suku Bobonaro Vila, postu administrativu Bobonaro, munisípiu Bobonaro, suru hela fo’er hosi valeta ku’ak liuosi PMOPA. Imajen Tatoli/Sérgio da Cruz.

BOBONARO, 03 agostu 2022 (TATOLI) – Traballadór aldeia Laktíl, suku Bobonaro Vila, postu administrativu Bobonaro, munisípiu Bobonaro, Roberto Guterres, konsidera programa mão de obra postu administrativu (PMOPA) bele motiva joven sira badinas halo serbisu iha atividade diária.

Notísia relevante: Governu aloka rihun $698-resin implementa PMOPA iha Bobonaro

“Ha’u haree governu nia programa ne’e kapás tebes, tanba ida-ne’e mós bele diminui problema no la baruk ona, ami bele badinas serbisu liután,,depois ida-ne’e karik iha problema pasadu ruma sira-ne’ebé akontese bele mai halo amizade iha-ne’e,” nia informa ba Tatoli, iha Bobonaro Vila, kuarta ne’e.

Enkuantu VIII Governu konstituisonál implementa programa ne’e atu kapasita komunidade,empodera no hakbi’it rekuperasaun ekonomía liu hosi aktividade limpeza iha estrada rurál no Urbana,hamos valeta,ateru no taka estrada koak hodi fasilita movimentasaun transporte públiku no aktividade ekonomia.

Hanesan xefe do grupu,Roberto reforsa,maski orsamentu ne’ebé governu prevee iha programa ne’e  kada loron ho montante $5 de’it,maibe bele ajuda netik hakbit ekonomia komunidade sira nia ba nesesidade loron balu.

Tanba ne’e nia husu ba VIII Governu konstituisonál,lideradu hosi Primeiru Ministru Taur Matan-Ruak,atu kontinua inplementa programa ne’e tanba motiva komunidade sira halo ambiente mos iha ida-idak áreador uma nia.

“Ami hosi hosi área ida ne’e kontenti la halimar, tanba ajuda ona ami bele halo limpeza ida ne’e,hadia ami nia bairu,foer sira ne’e ami hamos hotu tau iha fatin ne’ebé diak no seguru,atu nune’e bele hela iha ambiente ne’ebé mos no moras seluk labele hadaet,” nia hatutan.

Xefe suku Bobonaro Vila, Domingos Belo, louva inisiativa governu nian tanba kontinua implementa programa ne’e hodi rekupera ekonomia no liuhosi atividade ne’e moos bele hamenus dezempregu.

“Ami nu’udar líder lokál iha Timor laran tomak nia ezijensia ne’e hanesan de’it, tanba ami motiva ami-nia ema atu sai ema, ne’e duni presiza tebes serbisu ne’e tanba ita-nia nasaun pasa iha situasaun ne’ebé krize ekonomia no polítika,maka’as afeta ba serbisu laiha, entaun liuhosi mekanismu PMOPA bele ajuda ona sira,” nia hateten.

Nia salienta, benefisiáriu hosi programa ne’e povu tomak, tanba ne’e iha prosesu identifikasaun traballadór autoridade lokál sira hola inisiativa envolve mós feto, liuliu joven feto sira-ne’ebé iha vontade serbisu.

“Ami hola inisiativa ida ne’e tanba igualdade jéneru importante tebes, ita labele fó oportunidade de’it ba mane, maibe tenke fó mós ba feto, tanba sira mós bele halo serbisu mane nian, ne’e duni serbisu ida-ne’e, oituan ka barak sira hotu sei hetan direitu hanesan,” nia subliña.

Suku sira iha Bobonaro Vila, iha pakote haat hosi hosi aldeia rua hanesan Laktíl no Lesi-Gatál, sei halo limpeza jerál hosi parte administrasaun postu Bobonaro ba to’o semitériu Bobonaro, kontinua ba to’o área Tulu-Ata ho durasaun tempu loron 15.

Munisípiu Bobonaro hetan alokasaun orsamentu hosi Ministeriu Administrasaun Estatál (MAE) ho montante $698.497,98 liuhosi Orsamentu Jerál estadu (OJE) tinan fiskál 2022 hodi implementa programa PMOPA iha suku 50 iha postu administrativu neen.

Notisia relevante:Autoridade Bobonaro lansa programa PMOPA faze dahuluk

Jornalista   : Sérgio da Cruz

Editór           : Evaristo Soares Martins

iklan
iklan

Leave a Reply

iklan
error: Content is protected !!