Governu distribui nesesidade bázika ba vítima inundasaun 169 iha Suai Loro
COVALIMA, 10 agostu 2022 (TATOLI)–Governu liuhosi Komisaun Jestaun Dezastre Naturál munisípiu Covalima (KJMC) distribui nesesidade bázika ba vítima inundasaun na’in-169 iha suku Suai Loro, postu administrativu Suai, munisipiu Covalima.
Notísia Relevante: Uma-kain 42 afeta ba dezastre natural iha Covalima seidauk hetan apoiu hosi Governu
“Atividade ohin distribui nesesidade bázika hodi fó apoiu ba komunidade afetadu ba inundasaun ne’ebé akontese iha 30 juñu 2022 ne’e ba faze dahuluk fó ona apoiu emerjensia ba vítima 169 iha Suai Loro, tanba iha tan lista adisionál bainhira simu reklamasaun hosi suku no aldeia sira,” Komandante Operasionál Autoridade Protesaun Sivil munisípiu Covalima, Inspetór Xefe Polísia Flavio dos Santos Mendes, relata ba jornalista sira iha resintu postu administrativu Suai, kuarta ne’e.
Komisaun Jestaun Dezastre Naturál Munisípiu covalima distribui nesesidade bázika ba vítima inundasaun sira, tanba ekipa sira hafoin halo verifikasaun iha terrenu katak família sira-ne’e afetadu ba inundasaun ne’ebé kategória kmaan.
Ho nune’e, Governu iha forsa no ajuda atu hakmaan netik sira-nia sofrimentu hodi fó apoiu emerjénsia hodi fó hahan no la’ós fó ai-han ba vítima sira.
Vítima inundasaun Basilio da Costa hato’o agradese ba Estadu ne’ebé fó apoiu nesesida bázika ba vítima sira, maske fó apoiu la barak maibé bele fó no hakmaan netik vítima sira-nia terus.
“Ami sente di’ak no agora ami foin hetan apoiu tanba foin lalais apoiu faze dahuluk ami-nia naran iha lista laiha entaun ami la simu. Tanba falta dokumentu no hafoin ami kompleta ami-nia dokumentu, nune’e ohin ami bele simu ona. Tanba ne’e, ha’u hato’o agradese ba Estadu tanba Dezastre naturál akontese la’ós Estadu mak haruka maibé ida-ne’e natureza,” nia dehan.
Vítima inundasaun ne’ebé ekipa distribui nesesidade bázika ne’e hosi suku Suai Loro, aldeia Loro, Loo, Mane-Ikun no Akar Laran, ne’ebé kada uma-kain ida simu foos saka ida, terpal, masin, basia no supermie dos ida.
Notísia Relevante: PR fó apoiu nesesidade bázika ba vítima inundasaun iha Covalima
Jornalista : Celestina Teles
Editór : Cancio Ximenes
