DILI, 16 agostu 2022 (TATOLI)–Ministru Finansa, Rui Augusto Gomes, hateten, atu garante sustentabilidade fundu petrolíferu maka Ministériu Finansa (MF) halo ona intervensaun balun no buka empréstimu konsensionáriu.
“Ida maka ita halo ona segimentasaun ba fundu ne’e rasik. Aleinde ne’e, Governu buka empréstimu konsensionáriu ho funan kiik atu proteje ita-nia rain, ida-ne’e maka daudaun ita halo,” Ministru informa ba iha Palásiu Prezidensiál, Bairro Pité, tersa ne’e.
Tuir Ministru, relasiona ho Estadu Timor-Leste lakon osan biliaun $1,6 hosi fundu petrolíferu, liga ba merkadu internasionál ka merkadu finanseiru Governu laiha kontrolu ba ne’ebá.
Notísia relevante: Timor-Leste lakon biliaun $1,6 tanba implikasaun hosi inflasaun globál
Aleinde ne’e, Governu halo investimentu liuhosi projetu Parseria Públika Privada (PPP) ne’ebé bele estimula no konvida setór privadu atu tau sira-nia investimentu.
“Kada tinan Governu foti osan ho montante boot hosi fundu petrolíferu, liu Rendimentu Sustentabilidade Estimadu (RSE) ne’ebé implika. Ita haree ona katak ita-nia fundu petrolíferu tuir loloos pur volta biliaun $22,” nia akresenta.
Ministériu Finansa halo ezersísiu bazeia ba cash flow ne’ebé Governu kontrola didi’ak osan, katak presiza osan mak foin foti osan hosi fundu petrolíferu.
Notísia relevante: Fundu mina-rai trimestre daruak tun ba biliaun $17,84
“Ita labele foti osan. Diverfikasaun ekonómika ne’e ha’u hanoin resposta di’ak ida atu subtitui ita-nia fundu petrolíferu rasik, to’o agora ita seidauk diversifika didi’ak ita-nia ekonomia,” nia tenik.
Reseita doméstika agora pur volta millaun $180, tanba ne’e Governu espera bele sa’e to’o millaun $220, maibé sei serbisu maka’as.
Governu liuhosi MF deklara katak hosi fulan-janeiru to’o marsu 2022, Estadu Timor-Leste lakon biliaun $1,6 hosi retornu fundu petrolíferu.
Nune’e mós, Banku Sentrál Timor-Leste (BCTL, sigla portugés) lansa relatóriu trimestre daruak ne’ebé termina iha loron 30 juñu 2022, ne’ebé relatóriu ne’e hatudu katak kapitál fundu iha trimestre daruak tun ba biliaun $17,84, kompara ho trimestre dahuluk ho montante biliaun $19,12.
Jornalista : Antónia Gusmão
Editora : Julia Chatarina
