BOBONARO, 22 agostu 2022 (TATOLI) – Sentru Atendimentu Agríkola Kuda Ulun Bobonaro (CAKKUB) sei distribui foos-rai hamutuk tonelada 50 ba Sentru Lojístika Nasionál (CLN, sigla portugés) iha fulan-agostu tinan 2022.
Prezidente CAAKUB, António Barreto da Conceição, hateten foos hirak-ne’e dadaun ne’e balu konklui ona prosesamentu no balun sei iha hela prosesu, kompostu hosi tipu Sihara, Nakroman no IR64.
Enkuantu foos-rai ne’e sosa ho folin kada kilograma $0, 40 hosi grupu agrikultór sira-ne’ebé durante ne’e utiliza bee hosi irrigasaun Maliana I hodi halai natar hahú iha tinan 2021 no époka dahuluk tinan ne’e nian.
Notisia Relevante: CAAKUB sosa hare-kulit tonelada 130 hosi agrikultór Bobonaro
“Iha loron 23 fulan-maiu, ha’u asina ona kontratu ho CLN atu hatama foos tonelada 50 ba CLN kada kilograma ida ami fa’an ho folin $1,25 ,agora ami prepara hela aban ekipa CLN sira sei mai, ami enkontru parese ke semana oin ami hahú fornese ona,” nia ko’alia iha Maliana, segunda ne’e.
António akresenta, kontratu ne’ebé nia parte asina ho CLN sita katak data validade ba fornesimentu foos ne’e sei termina iha fulan-outubru tinan ne’e, maibe ba oin asosiasaun sei garante foos ne’e ninia kualidade nune’e bele hetan konfiansa hodi estende tan bainhira governu iha nesesidade.
Prezidente ne’e reforsa, foos-rai ne’ebé CAAKUB sosa no halo ona prosesamentu hatudu rezultadu di’ak, tanba molok distribui ba governu no kliente no sira sei halo uluk teste ho ekipamentu modernu ne’ebé apoia hosi JICA.
“Ha’u hanoin buat ida kualidade ne’e importante, ba ema komprador no konsumidór, nia hasai osan sosa buat-ne’ebé di’ak, iha semana rua kotuk sira hosi CLN mai halo inspesaun ba ita nia foos, sira hatete foos ne’e iha kualidade no serve duni atu distribui ba CLN no kliente sira,” nia dehan.
CAAKUB garante sei distribui foos rai ho variedade tolu hanesan, mutin, metan no mean ba merkadu sira iha kapitál Dili hanesan loja supermerkadu Kampung Alor, Syara iha Praia dos Coqueiros, Gracia supermerkadu inklui mos restaurante sira iha kapitál Maliana.
Enkuantu presu ba foos rai kada kilograma ho folin $1,10 sentavu, saka ida 25 kilograma nia ne’e folin $26,50, kilograma 10 ho folin $11,00 , foos ikis 25 kilograma $10 dolar.
Durante ne’e CAAKUB sosa hare-kulit hosi grupu agrikultór hamutuk 28 no totál agrikultor ne’ebé hamahan-aan iha asosiasaun ne’e na’in-300 resin, mai hosi suku Lahomea, Raifun, Ritabou, Odomau no Holsa ho natar luan ektare 226,226.
Notisia relevante:CAAKUB planeia sosa hare-kulit hosi grupu agrikultór
Jornalista: Sérgio da Cruz
Editór: Evaristo Soares Martins
