iklan

INTERNASIONÁL, DESPORTU, DILI, HEADLINE

Semana oin, LFTL komunika klube futeból realiza liga époka 2022-2023

Semana oin, LFTL komunika klube futeból realiza liga époka 2022-2023

Prezidente LFTL, Nilton Gusmão. Imajen Tatoli/dok.

DILI, 02 setembru 2022 (TATOLI)– Prezidente Liga Futeból Timor-Leste (LFTL), Nilton Gusmão, hateten LFTL nia pozisaun firme atu realiza liga futeból iha époka 2022-2023, nune’e semana oin, hahú komunika klube futeból sira hodi diskute ba preparasaun realiza liga futeból  Timorense ne’e.

“Ami iha vontade tebes atu realiza liga iha tinan ne’e, maibé iha impedementu oituan, nune’e ami sei tuur hamutuk ko’alia oinsá bele realiza liga, tempu besik sei komunika ho klube sira atu rona sira nia hanoin kona-ba realiza liga ne’e no haree hamutuk problema sira ne’ebé ita hasoru hela,” katak Nilton Gusmão ba Jornalista-sira iha Estádiu Munisipál Dili, kinta ne’e.

Notísia relevante:  LFTL preparadu realiza liga futeból époka 2022 

Pozisaun LFTL nian mak prontu no kontinua mantein nafatin situasaun servisu iha área futeból hodi bele realiza liga époka ne’e.

“Maibé iha sirkuntánsia balun tenke depende ba Sekretáriu Estadu Juventude no Desportu (SEJD), Federasaun Futeból Timor – Leste (FFTL), ita mós depende ba patrosinadór sira, entaun iha situasaun balun difikulta ita atu bele tuir bebeik saida mak ita hakarak, maibé LFTL komprometidu nafatin atu buka solusaun hodi realiza liga iha tempu badak,” Prezidente LFTL ne’e kompromete.

Hataan ba deklarasaun FFTL nian, ne’ebé antes ne’e husu LFTL tenke buka rasik osan 50% atu realiza liga tanba SEJD no FFTL tau ona 50%, Nilton dehan hanesan tinan lima ba kotuk realiza liga presiza osan rihun $700-resin.

Notísia relevante:  FFTL husu LFTL koopera realiza liga futeból époka 2022 

“Sé FFTL dehan sira tau rihun $200, SEJD tau rihun $200, ami tenke buka tan verba seluk ne’ebé ita presiza atu kompleta hodi realiza liga ne’e, maibé ha’u labele afirma ami atu tau hira tanba depende tebes ba patrosinadór sira, no ha’u la fiar ohin, ita ko’alia ema lori kedan osan mai tau hodi realiza liga ne’e,” nia hatutan.

“Nune’e mak ha’u labele dehan ho loloos ami atu tau osan hira tanba ami nia kaisa rasik de’it zero, maibé ho ami nia forsa vontade atu organiza ami fiar ami bele,” katak.

Entretantu, FFTL mós husu LFTL relata relatóriu liga no patrosinadór nian ema númeru ida iha liga ne’e.

“Durante ne’e relatóriu ita sempre hatoo, maibé dirijente FFTL nian balun okupadu liu la lee relatóriu hirak ne’e, depois dehan iha mídia husu tan relatóriu. Relatoriu hosi LFTL nunka falla kada époka ne’ebé hotu ami submete kedan ba SEJD no FFTL,” nia afirma.

Notísia relevante:  SEJD-FFTL sei aloka $400.000 realiza liga époka 2022

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!