DILI, 12 setembru 2022 (TATOLI)—Prezidente Autoridade Munisípiu (PAM) Dili, Guilhermina Filomena Saldanha Ribeiro “Margi” informa, segunda ne’e, Konsultan Cowi hosi Dinamarka fó formasaun ba membru Projetu Manejement Unit (PMU) na’in-10 kona-ba jestaun lixu iha kapitál Dili.
Notísia Relevante: Ekipa Darwin aprezenta Jestaun Lixu no Resiklajen ba AMD
“Ita-nia formasaun ne’e ba sira Projetu Manejement Unit (PMU) kona-ba jestaun lixu. Tanba, depois sira halo tiha rekrutamentu no sira mós ba foti ona informasaun balun iha terrenu. Entaun, presiza mós sira hetan formasaun kona-ba aban bainrua sira-nia responsabilidade ba iha kontrolu, jestaun, supervizaun no ba projetu tomak lixu nian liu-liu hahú hosi rekolla, transportasaun no tratamentu,” Prezidente Autoridade Munisípiu (PAM) Dili ne’e informa ba Agéncia Tatoli iha nia kna’ar fatin, Díli, segunda ne’e.
Tuir nia, formadór ba formasaun kona-ba jestaun lixu ba membru PMU na’in-10 ne’e, mai hosi Kowi nu’udar konsultór.
“Formasaun ne’e hala’o hosi Cowi nu’udar konsultór no sira mai hanesan formadór hodi fó formasaun ba partisipante na’in-10, atu nune’e bele hakbiit sira-nia kapasidade. Bainhira projetu ne’e hala’o saida mak sira tenke halo ida-idak nia servisu, tuir nia kompetensia ba iha kontrolu ba rekolla, jestaun no tratamentu lixu,” nia dehan.
Maske nune’e, partisipante ne’ebé partisipa iha formasaun kona-ba jestaun lixu mai hosi partisipante na’in-10 ne’ebé foin dadauk Autoridade Munisípiu Dili halo rekrutamentu ba jestór PMU no Finansa.
“Partisipante mai hosi sira-nia na’in-10 ne’ebé foin dadauk halo rekrutamentu ba jestor PMU rasik, finansa no ba tékniku ne’ebé balun hosi JIS, Enjiñeiru no tékniku balun ne’ebé iha relasaun kona-ba halo jestaun ba lixu, ne’ebé maizumenus sira na’in-10, inklui sira-nia Diretór SEMASA,” nia informa.
Tuir Prezidente Autoridade Munisípiu Dili hateten, bainhira kontratu pesoál ba servisu presiza halo formasaun, nune’e bele iha koñesimentu servisu.
“Sira mai hosi Background keta-ketak. Mezmu ida-idak nia servisu maibé entermu koordenasaun no kooperasaun, entaun tenke tau hamutuk hodi haree kompetésia servisu, oinsá sira koordena no koopera bainhira hala’o servisu. Tanba, barak liu iha jestór, hanesan Project Manejement Unit nia servisu mak boot. Nia atu haree hosi prosesu no atividade hotu kona-ba jestaun rekolla, tratamentu lixu no iha parte finansa nia haree kona-ba oinsá halo jestaun finansa bainhira kompañia sira halo pedidu pagamentu mak nia halo pagamentu. Maibé, sira seluk haree kona-ba tratamentu, oinsá foti lixu, foti oinsá no ba tratamentu iha ne’ebá,” nia dehan.
Diretór Servisu Munisipál Agua Saneamentu no Ambiente, Hermínio Moniz Ribeiro, hateten formasaun kona-ba jestaun lixu ne’e ligasaun ho preparasaun ba implementasaun projetu resource urbana, ne’ebé ho nia objetivu atu membru Project Manegement Unit (PMU) sira kompreende kona-ba kontratu tolu ne’ebé iha projetu, kontratu ekipamentu, kontratu funsaun no transportasaun no kontratu ateru kontroladu.
Tanba, depois sira hetan formasaun mak sira bele ona kompreende atu oinsá atende ba kompañia no oinsá sira-nia servisu tuir termu referénsia ne’ebé iha, atu nune’e ikus mai sira laiha difikuldade ona hodi implementa projetu ne’e, tanba projetu ne’e foun.
“Tanba ne’e molok atu implementa sira tenke iha kuñesimentu téknika kona-ba projetu ne’e rasik,” nia esplika.
Entretantu, tuir informasaun hosi Diretór Servisu Munisipál Agua Saneamentu no Ambiente, katak partisipante sira-ne’ebé tuir formasaun kona-ba jestaun lixu hamutuk 20, ne’ebé fahe ba pakote rua, hanesan pakote ida ho partisipante na’in-10 ne’ebé ohin tuir formasaun ho durasaun loron neen no pakotedaruak ba na’in-10 seluk sei tuir formasaun iha fulan novembru ho durasaun loron neen.
Jornalista : Nelia Fernandes
Editór : Cancio Ximenes
