DILI, 14 setembru 2022 (TATOLI)—Pesoál limpeza iha jardin Cristo Rei, Celestina Ximenes, dadaun ne’e preokupa ho saláriu ne’ebé simu tarde hosi Governu liuhosi Autoridade Munisípiu Dili (AMD).
Notísia Relevante: Pesoál limpeza husu Governu hadi’a gazebo iha Areia Branca
“Ami iha ne’e presiza tebes ho ami-nia saláriu, maske $115 mós ami hakarak simu iha fulan-fulan. Agora ami-nia saláriu dala ruma simu to’o fulan tolu ka haat. Ezemplu, to’o fulan tolu simu $330, ida ne’e laiha tanba dala ruma to’o fulan tolu ami simu de’it fulan rua nian ho osan $230 no fulan tolu ami simu fulan rua nian no mós fulan rua ami simu fulan ida nian. Tanba ne’e, ami sujere liu iha ami-nia saláriu maske saláriu bele kiik ami hakarak simu fulan-fulan,” Celestina Ximenes hateten ba Agência Tatoli, iha jardin Cristo Rei, Dili, kuarta ne’e.
Tuir nia, osan ne’ebé simu nia parte sei uza ba nesesidade uma laran no selu oan sira-nia eskola, tanba ne’e nia husu se bele haree sira-nia osan atu sira bele simu iha fulan-fulan.
Tanba,nia dehan, bainhira asina kontratu atu hala’o servisu hodi hamoos lixu iha jardin Cristo Rei, nia parte la rona informasaun katak saláriu simu tarde.
“Antes ami atu asina kontratu, ami seidauk simu informasaun katak ami sei simu saláriu tarde iha fulan-fulan, tanba ne’e ami asina de’it kontratu depois servisu. Ho ida-ne’e, hanesan pesoál limpeza ha’u sente triste tebes, tanba ami sempre halo servisu hamoos iha ita-nia jardin Cristo Rei maibé to’o fulan ami-nia saláriu simu tarde,” nia dehan.
Administradór postu administrativu Cristo Rei, munisípiu Dili, Venancio Tavares, hateten nia parte rona ona informasaun kona-ba pesoál limpeza iha jardin simu saláriu tarde no daudaun ne’e esforsu atu rezolve asuntu ne’e.
“Ha’u rona ona katak ita-nia pesoál limpeza iha jardin Cristo Rei sempre simu saláriu tarde iha fulan-fulan. Ho ida-ne’e ha’u sei ko’alia fali ho Diretora Finansa no Adjuntu Munisípiu Dili, nusa mak akontese hanesan ne’e, afinál ema servisu ona maibé nusa simu saláriu tarde,” nia dehan.
Diretora Finansa Autoridade Munisípiu Dili (AMD), Ana Fernanda G. Junior, dehan pesoál ne’ebé limpeza iha jardin Cristo Rei simu saláriu tarde, tanba AMD simu pedidu pagamentu tarde hosi postu administrativu.
“Pesoál limpeza iha jardin sira ita-nia osan ne’e haruka ba Postu Administrativu kada fulan, maibé dala ruma pedidu pagamentu hosi ita-nia Postu Administrativu haruka mai tarde, tanba ne’e dala ruma ita prosesa tarde,” nia dehan.
Tuir nia, pesoál limpeza iha jardin sira atu simu saláriu, Administradór no Administradora Postu sira tenke haruka pedidu pagamentu, inklui lista prezensa servisu kada fulan mai Autoridade Munisípiu Dili hodi prosesa.
“Tanba, proposta ne’e sei hato’o ba ita-nia Prezidente Autoridade Munisípiu, depois despasu tun fali mai Finansa atu prosesa. Maibé kuandu tarde ami mós labele halo buat ida. Tanba ne’e, tenke liuhosi PAM tenke hatun mai ami, ne’ebé sei sira tarde ami mós labele halo buat ida,” nia dehan.
Entretantu, pesoál limpeza ne’ebé durante halo servisu iha jardin Cristo Rei hamutuk na’in-30, ne’ebé kompostu hosi feto no mane.
Jornalista : Nelia Fernandes
Editór : Cancio Ximenes
