DILI, 15 setembru 2022 (TATOLI)—Xefe Sentru Saúde Ermera Vila, Manuel Soares, informa hahú janeiru to’o agostu tinan ne’e, rejista pasiente ho moras Infesaun Vias Respiratóriu Aguda (ISPA) hamutuk 20.588
“Hahú hosi janeiru mai to’o agostu, ita rejista pasiente moras infesaun vias respiratóriu ka ISPA hamutuk 20.588, hosi númeru ne’e mane na’in-8.585 no feto 12.003. Moras ne’e afeta maioria labarik ki’ik to’o ema boot, hahú hosi idade fulan-neen to’o tinan 60” Xefe Sentru Saúde hateten ba Agência TATOLI via telefónika, kinta ne’e.
Populasaun hetan moras ISPA tanba kauza hosi iklíma ka tempu bailoron ne’ebé hamosu rai-rahun no ahi-suar.
Daudaun ne’e, Profisionál Saúde iha Sentru Saúde Ermera hala’o sensibilizasaun saúde, liuliu ba labarik kiik sira tenke haris ho bee moos, fase liman, hemu bee ne’ebé moos no bainhira sai ba fatin públiku tenke uza máskara atu prevene moras ne’e.
Nia husu husu mós inan-aman sira atu lori hakbesik labarik sira ba sentru saúde hodi hetan imunizasaun kompletu hodi hasa’e sira nia imunidade hodi kontra moras sira ne’e.
“Kona-ba moras ISPA ne’e nia tratamentu regular hanesan baibain tanba ISPA hatudu sintoma mear, inus been, isin manas, entaun ita halo tratamentu tuir moras ne’ebé iha, maibé tama ona ba pneumonia ka iis boot ita presiza fó ai-moruk antibíotiku hodi hamenus moras ne’e,” nia afirma.
Alende ne’e, Sentru Saúde mós rejista moras diareia na’in-1.689, kompostu hosi mane 811 no feto 878, ne’ebé maioria moras ne’e afeta ba larik ki’ik sira. Tuir fali mak moras kulit hamutuk 352, kompostu hosi mane 175 no feto 177, ne’ebé afeta ba labarik ki’ik to’o ema boot.
Kona-ba ekipamentu médiku no médikamentu iha sentru, Xefe Sentru ne’e dehan sufisiente hodi halo atendimentu ba pasiente, maibé kuandu iha kazu grave mak laiha fasilidade adekuadu halo atendimentu, deside transfere kedan ba Sentru Saúde Gleno no bá Hospitál Nasionál Guidu Valadares (HNGV).
Profisionál saúde sira ne’ebé mak halo kna’ar iha Sentru Saúde Ermera hamutuk 24, kompostu husi médiku na’in-tolu, Enfermeiru na’in-neen, Parteira na’in-tolu, Tékniku aliadu kompostu husi analista na’in-rua, Farmásia na’in rua, Pesoál Saúde Públiku na’in-haat inklui dentaria na’in-rua no mós motorista ida.
Jornalista : Felicidade Ximenes
Editór : Florencio Miranda Ximenes
