DILI, 23 setembru 2022 (TATOLI)-Portavós Komandu Jerál Polisia Nasionál Timor-Leste (PNTL), Superintendente Xefe Armando Monteiro, hatete komandu PNTL halo ona desizaun hodi suspende membru ida relasiona ho joven ida ne’ebé mate iha sela PNTL Kaikoli foin lalais ne’e.
“Hafoin akontesimentu ba kazu ne’e, parte Komandu Jerál forma kedan ekipa konjunta internál hodi halo investigasaun ba kazu sidadaun JB ne’ebé mate ho kondisaun fiu eletrisidade iha kakorok, iha sela Komandu PNTL”, Armando Monteiro ba jornalista sira iha Kaikoli, sesta ne’e. Nia hatutan, antes ne’e komandu suspende uluk ona membru nain ualu.
Portavós Komandu Jerál PNTL ne’e dehan relatóriu investigasaun sei submete ba nivel komandu jerál hodi estuda no foti desizaun.
Notísia relevante: Kazu mate iha sela polísia, PNTL fó suspensaun preventiva ba membru na’in-8
“Ekipa investigasaun internál PNTL, sira konklui ona. Relatóriu investigasaun sira hasae ona ba nivel komandu jerál, nune’e atu bele estuda hodi foti desizaun. Tanba kazu ne’e krime, kuandu iha indísiu krime maka komandu sei foti desizaun ba ida ne’e”, karak nia.
Jornalista : Natalino Costa
Editora : Rita Almeida
