DILI, 03 outubru 2022 (TATOLI)—Diretora Aprovizionamentu Armazenamentu no Estokajen, Adelina Andrade, hateten, Governu liuhosi Sentru Lojístika Nasionál (CLN, sigla portugés) iha ona planu atu sosa tan foos importasaun tonelada 10.000, iha tinan oin.
“CLN iha planu tinan oin sosa foos importasaun tonelada 10.000 ho orsamentu millaun $3,” Diretora informa ba Agência Tatoli, iha ninia knaar fatin, Bebora, segunda ne’e.
Maski nune’e, CLN seidauk hatene atu sosa hosi nasaun ne’ebé tanba sei liu Komisaun Nasionál Aprovizionamentu (CNA, sigla portugés) hodi loke konkursu públiku.
“Ita hein tinan oin tama fulan-janeiru bainhira iha ona promulgasaun orsamentu mak ita hatene nasaun ne’ebé mak ita sei halo akizasaun foos,” nia akresenta.
Notísia relevante: Foos importasaun falta tonelada 2.000 iha armazen Bebora
CLN nia planu atu sosa tan foos importasaun ho objetivu hodi reforsa seguransa alimentár iha rai-laran.
“Ita-nia objetivu atu sosa produtu lokál 60% no importasaun 40% maibé tanba ita-nia kuantidade produsaun iha rai-laran la to’o maka ita sosa hosi nasaun li’ur,” nia tenik.
Jornalista : Arminda Fonseca
Editora : Julia Chatarina
