DILI, 03 outubru 2022 (TATOLI)—Diretora Aprovizionamentu Armazenamentu no Estokajen, Adelina Andrade, hateten, foos akizasaun hosi nasaun Vietname tonelada 4.750 daudaun ne’e falta tonelada 2.000 iha armazenamentu Bebora.
“Foos daudaun iha iha tonelada 2.000 iha armazen Governu nian iha Bebora, maibé hosi númeru ne’e ita sei atende tan pedidu, entaun ita konta loloos to’o dezembru iha foos tonelada 1.000,” Diretora informa ba Agência Tatoli, iha ninia knaar fatin, Bebora, segunda ne’e.
Antes ne’e, Governu halo akizisaun foos ho objetivu atu atende situasaun dezastre naturál no intervensaun merkadu nasionál bainhira folin sasán sa’e.
“Foos ne’e mai iha fulan-juñu nia rohan, hahú utiliza iha fulan-jullu nia-laran, Sentru Lojístika Nasionál (CLN, sigla portugés) distribui tonelada 1.000 ba Ministériu Solidaridade Sosiál no Inkluzaun (MSSI) hodi responde ba ema kbiit laek no intervensaun merkadu hamutuk tonelada 150, inklui pedidu sira seluk ne’ebé tama,” nia akresenta.
Notísia relevante: CLN kontinua transporta foos importasaun tonelada 4.800 ba armazen nasionál
Nune’e mós, CLN fó sai foos tonelada 150 iha parte dahuluk ba empreza 20 resin hodi halo intervensaun merkadu.
“Intervensaun ba merkadu nia reseita ita lahatene tanba sira selu rasik iha banku mak ita oferese foos,” Diretora tenik.
Aleinde ne’e, CLN rezerva produtu lokál balun iha armazen Tibar, Maliana no Natarbora atu garante seguransa alimentár iha situasaun emerjénsia.
“Hosi armazen tolu ne’e, Governu sosa produtu lokál item neen hanesan hare kulit, fore-rai, fore-mungu, fore-metan no seluk tan ho kuantidade tonelada 150 no foos tonelada 1.500,” nia dehan.
Governu sosa produtu lokál sira hosi empreza lokál no grupu agrikultór sira to’o outubru tinan ne’e nia rohan no produtu sira ne’e sei tama hotu ba armazen sira.
“Ita aloka osan millaun $3 hodi sosa produtu lokál, kompostu hosi ba foos millaun $1,8 no produtu seluk millaun $1,2. Foos númeru boot tanba ba nesesidade ne’e boot,” nia dehan.
Jornalista : Arminda Fonseca
Editora : Julia Chatarina
