Husi Dili bá Pekín: Eh, sá istória maka koserva iha Muzeu Komunista Xina? (Parte VI)

DILI, 15 Agostu 2026 (TATOLI)—Iha Kinta (23 Jullu 2026) dadeersan ne’e, husi RoyalLink Ziyu Hotel, ha’u sikat-leet iha delegasaun jornalista timoroan na’in-23 seluk iha autokarru ida-nia laran atu halo viajen bá Muzeu Komunista Xina iha Pekín.

Iha viajen naruk ida-nia laran, ha’u haree, ha’u-nia belun sira habosok sira-nia matan ho panorama sidade Xineza nia furak. Maibé, ba ha’u, matan ne’e hateke bá dalan rohan ne’ebá, lori ha’u hamout an iha imajinasaun ida-nia laran. Sá imajen no istória maka konserva iha muzeu ne’e nia laran? Oinsá maka bele halibur istória komunizmu Xinés nian? Tanbasá maka muzeu ida-ne’e signifikativu tebes ba nasaun ida?

Notísia relevante: Husi Dili bá Pekín: Laloran AI labele troka manu-ain sai ajente ba lia-loos (Parte V)

Lia-hahusuk sira-ne’e la hetan kedas resposta imediata. Bainhira ami dolar besik bá fatin destinadu, ha’u-nia kuriozidade atu hatene kona-ba muzeu ne’e aumenta boot liután. Kuriozidade nakfilak bá esperiénsia. Afinál, muzeu la’ós de’it edifísiu ida-ne’ebé haloot sasán sira hosi pasadu. Muzeu nu’udár espasu ida iha-ne’ebé nasaun ida ko’alia ba jerasaun atuál liuhosi nia istória nia ain-le’ut sira.

Matadalan Muzeu haktuir katak muzeu ne’e espesífiku ba istória Partidu Komunista Xina nian ne’ebé ikusmai nakfilak ba Muzeu Nasionál Xina. Konstrusaun muzeu hahú iha 2018, no ramata iha 05 Maiu 2021. Muzeu loke ofisialmente ba públiku iha 18 Juñu 2021, iha tempu komemorasaun tinan 100 Partidu Komunista Xina.

Edifísiu ne’e modelu letra “工”, ne’ebé iha interpretasaun simbólika kona-ba raízes partidu iha klase operária. Arkitetura uza koluna no korredór ho estilu tradisionál Xina, ne’ebé ho sentidu fó imajen solene, boot no dignu. Iha prasa oin edifísiu nian, mós iha eskultura no elementu sira-ne’ebé reprezenta istória no espíritu revolusionáriu.

Ami hetan konvite atu tama iha muzeu no hakat-tuir (esplora) kolesaun oioin ne’ebé maka aruma iha laran. Fotografia istórika sira maka aspetu ida-ne’ebé dada ha’u-nia atensaun. Ema-nia oin, eventu polítiku sira, moris sosiál, no momentu importante sira iha istória Xina nian aprezentada liuhosi dokumentasaun vizuál no naun vizuál.

Iha aprezentasaun fotografia sira, istória la’ós apenas abstratu ne’ebé sentidu laek. Nia aprezenta an liuhosi aparénsia (oin), fatin sira, eventu sira, no atmosfera sira-ne’ebé uluk eziste. Foto idaidak iha nia istória rasik—haktuir tempu ida-ne’ebé nasaun ida buka hela nia diresaun, iha luta ida-ne’ebé forma identidade polítika, no iha mós mudansa sosiál ne’ebé ikusmai sai parte husi viajen naruk Xina nian.

Muzeu ne’e, konserva fotografia hamutuk 2.500 no objetu kulturál hamutuk 4.500, inklui artefaktu atu konta istória partidu liuhosi ninia luta, sakrifísiu, dezenvolvimentu teóriku, servisu ba povu no konstrusaun organizasaun.

Aleinde fotografia, karreta ho marka Hongqi ne’ebé babain nai-ulun Xina uza ba parada militár iha kada tinan, hotu-hotu konserva iha fatin ne’e sai memória. Kareta Hongqi símbolu istória no podér nasionál Xina ne’ebé prezerva hosi jerasaun ba jerasaun.

Nu’udár ema ida-ne’ebé hala’o profisaun iha vida jurnalístika, vizita ida-ne’e mós permite ha’u atu haree istória husi perspetiva ida-ne’ebé diferente. Fotografia ida la’ós de’it atu kompleta hakerek. Ida-ne’e bele sai dokumentu istóriku, fonte informasaun, no sasin vizuál ba era ida. Husi ne’ebá, ha’u komprende katak dokumentasaun iha valór ba tempu naruk: buat ne’ebé rejistadu ohin loron bele sai matéria aprendizajen ba jerasaun sira iha futuru.

Muzeu ne’e mós hatudu oinsá istória bele sai hanesan esperiénsia edukasionál ida. Vizitante sira hetan konvite la’ós apenas vizita maibé mós atu lee, observa, kompara, no komprende viajen nasaun ida nian. Ida-ne’e maka vantajen ida hosi muzeu sira nu’udár espasu públiku: sira bele liga pasada ho nesesidade koñesimentu hosi sosiedade ohin-loron nian.

Husi perspetiva ekonómika, muzeu la’ós ho sentidu ne’ebé ki’ik. Muzeu bele halo-parte iha ekosistema turizmu kulturál. Prezensa husi vizitante sira hamosu atividade ekonómika iha área ne’ebá, husi transporte, akomodasaun, restaurante sira, loja lembransa sira, no servisu apoiu turizmu oioin. Bainhira halo jestaun ne’ebé di’ak, istória no kultura la sai de’it legadu ida maibé sei kontribui mós ba ekonomia nasaun nian.

Maibé, valór muzeu sira-nian labele sukat de’it hosi reseita ekonómika. Valór kulturál boot liu fali ida-ne’e. Muzeu ajuda nasaun ida atu prezerva nia memória koletiva. Nia serve hanesan espasu sira hodi introdús istória ba jerasaun foun sira no komunidade internasionál. Iha kontestu Xinés, muzeu istória sira hanesan ida-ne’e bele sai meiu ida atu komprende viajen polítika, sosiál no kulturál ne’ebé forma Xina moderna.

Ba ha’u, vizita ne’e husik hela lisaun simples: nasaun la’ós de’it harii husi futuru ida, maibé mós husi memória pasada nian. Istória ne’ebé prezervada ho di’ak, kuidadu, no aprezentadu ho di’ak bele sai hanesan ponte entre jerasaun sira.

Bainhira atu hahú hikas viajen ba fatin hakmatek nian (otél), pergunta sira-ne’ebé ha’u imajina iha autokarru laran neineik ba neneik hetan duni nia resposta. Ha’u to’o ho sentidu kuriozidade ida kona-ba saida maka muzeu, maibé sai ho komprensaun ida katak muzeu la’ós de’it fatin atu rai foto no objetu istóriku sira. Muzeu maka espasu memória nian, edukasaun, kultura, no parte ida-ne’ebé maka importante tebes iha nasaun ida nia vida ekonómika.

Jornalista: Osória Marques

Editór: Xisto Freitas da Piedade