Embaixada Indonézia organiza Festa Populár hodi selebra tinan 81 independénsia país
DILI, 15 Agostu 2026 (TATOLI) – Embaixada Indonézia iha Dili hala’o Festa Populár, ne’ebé envolve komunidade diáspora Indonézia iha Timor-Leste, nu’udar ámbitu husi série komemorasaun aniversáriu independénsia país ba da-81 (17 Agostu 1945-17 Agostu 2026), ho tema nasionál “Indonézia Soberanu, Justu no Prósperu”.
Festa Populár ne’e hala’o iha Embaixada Indonézia nian iha Faról, Dili, ne’ebé hahú husi tuku 07:30 dadeer to’o tuku 14:00 lokraik lokál, ne’ebé hatudu atividade oioin, inklui Ezersísiu Fuan Saudavel (Jantung Sehat) no Dansa Liña, nomós kompetisaun ba labarik sira no jogu tradisionál oioin ne’ebé liga ba tema selebrasaun independénsia Indonézia nian.
Charde Ad Interinu Embaixadór Indonézia iha Dili, Raden Sakunto Paksi, haktuir katak eventu ne’e fó espasu ba komunidade Indonézia no diáspora iha Timor-Leste tomak atu halibur hamutuk hodi simu no selebra aniversáriu independénsia nasaun nian ba da-81.
“Ohin, 15 Agostu 2026, iha Embaixada Indonézia iha Dili, hala’o hela Festa Populár (Festival Rakyat) ba komunidade Indonézia no diáspora Indonézia iha Timor-Leste laran tomak. Festa Populár ne’e, klaru, hala’o iha komemorasaun ba tinan 81 Independénsia Repúblika Indonézia nian”, Raden Sakuntu dehan ba Tatoli, ohin.
Tuir nia, Festa Populár hanesan forma agradesimentu ida ba independénsia ne’ebé nasaun ne’e nia eroi sira luta hodi hetan independensia, nune’e mós oportunidade ida ba komunidade atu selebra iha ambiente ksolok no nakonu ho unidade.
“Komemorasaun ne’e konserteza hanesan espresaun gratidaun ida no dalan ida hodi selebra independénsia Indonézia nian. Ema sira bele diverte an, goza kompetisaun sira, no ami mós fornese prémiu oioin”, nia realsa.
Kompetisaun tradisionál oioin anima eventu ne’e, inklui korrida saku, han krupuk, no jogu sira seluk ne’ebé kle’ur ona sai sinónimu ho selebrasaun sira loron 17 Agostu nian iha rejiaun oioin Indonézia nian.
Raden esplika katak tradisaun sira ne’e la’ós hala’o de’it iha Indonézia, maibé lori mós husu povu indonéziu no reprezentante sira iha nasaun oioin nu’udar dalan ida atu mantein espíritu hamutuk hodi komemora independénsia.
“Kompetisaun sira hanesan korrida ho saku no han krupuk maka tradisaun ida ba sira no ami kontinua lori ba mundu tomak, inklui Timor-Leste”, nia dehan.
Hodi hein katak Festa Populár sei la’o ho di’ak no sai hanesan momentu ida hodi hametin lasu no hamutuk entre Indonézia sira ne’ebé hela no serbisu iha Timor-Leste.
Embaixada Indonézia iha Dili mós hato’o ninia apresiasaun ba parte oin-oin ne’ebé fó apoiu ba Festa Povu, inklui empreza estatál (BUMN) Indonézia nian ne’ebé hala’o operasaun iha Timor-Leste, empreza privada sira, no empreza ki’ik no médiu.
“Ami hato’o ami-nia apresiasaun aas liu ba patrosíniu ba Festa Populár, inklui empreza estatál indonéziu oioin ne’ebé halo operasaun iha Timor-Leste, empreza privadu sira, no empreza ki’ik no médiu sira iha Timor-Leste”, nia esplika.
Atividade ne’e hetan apoiu husi Pertamina hanesan patrosinadór prinsipál, hamutuk ho Citilink, Dharma Wanita Persatuan, Indofood, CBP Sukses Makmur, Kapal Api, no Bank Mandiri.
Raden mós hato’o ninia apresiasaun ba Governu Timor-Leste no Polísia Nasionál Timor-Leste (PNTL) ba sira-nia asisténsia hodi mantein seguransa no garante la’o ho di’ak atividade sira hale’u kompleksu Embaixada Indonézia nian iha Dili.
Partisipante, Heriaty Pandiangan haktuir katak, Festa Populár la’ós de’it plataforma ida atu manán, maibé sai mós oportunidade ida atu hanoin no fó onra ba serbisu no sakrifísiu husi eroi sira ne’ebé luta ba independénsia Indonézia nian.
Nia fiar katak manán no lakon iha kompetisaun tenke haree hanesan parte ida husi prosesu harii hamutuk, aprendizajen, no desportividade entre partisipante sira.
Heriaty rekoñese katak nia orgullu nafatin bele partisipa maski la manán iha kompetisaun.
“Espíritu atu partisipa iha kompetisaun ne’e importante liu dook duké buka de’it prémiu, tanba eventu ne’e fó oportunidade ba povu Indonézia atu halibur hamutuk no selebra independénsia hamutuk”, nia konklui.
Notísia relevante: Embaixada Indonézia realiza resesaun diplomátika komemora tinan 80 independénsia
Jornalista: Arminda Fonseca
Editora: Maria Auxiliadora
