DILI, 12 juñu 2022 (TATOLI)—Foos akizisaun tonelada 4.800 hosi Vietname to’o ona iha Portu Dili iha loron sesta (10/06) no daudaun Sentru Lojístika Nasionál (CLN, sigla portugés) kontinua transporta ba armazen nasionál.
“Foos ne’ebé Governu halo akizasaun dadaun ne’e mai ona Timor-Leste, atraka iha Portu Dili desde sesta liubá. Desde to’o Portu Dili to’o domingu ne’e, funsionáriu CLN kontinua tula hodi ba hatama iha armazen Governu nian iha Bebora,” Prezidente CLN, Gervásio da Silva Cardoso, informa ba Agência Tatoli, via telefónika, domingu ne’e.
Notísia relevante: Foos importasaun tonelada 5.000 to’o iha inísiu abríl
Iha sorin seluk, Asesór Prinsipál Prezidente CLN, Joanico Gonçalves, esplika, antes ne’e, tuir planu Governu halo akizisaun foos hosi Tailándia, maibé tanba prosesu ne’e tarde, entaun tanba momentu ne’ebé situasaun COVID-19 tama situasaun emerjénsia maka CLN fó oportunidade ba empreza timor-oan halo akizisaun hosi Vietname.
“Tuir kontratu antes ne’e CLN selebra ho empreza na’in-tolu hanesan Charly unipesoal Lda, Esmelia unip Lda, no Santos unip,Lda, atu hatama foos mai, ne’ebé kada empreza importa foos tonelada 1.600, signifika ita-nia empreza tolu ne’e hatama foos hamutuk totál tonelada 4.800,” Asesór ne’e informa.
Antes ne’e, iha jullu 2020, Governu Timor-Leste halo akizisaun foos tonelada 30.000 ho kustu millaun $15 hosi vietname, ne’ebé inisiativa ne’e tama iha pakote sosiu-ekonómiku hodi rezerva iha situasaun emerjénsia no garante stock nasionál atubele kompensa bainhira foos menus durante surtu COVID-19.
Jornalista : Arminda Fonseca/Natalino Costa
Editora : Julia Chatarina
