COVALIMA, 13 outubru 2022 (TATOLI) –Kompañiã Internasional Timor Resources, kinta ne’e, simu ona materiál radiativu ne’ebé transporta hosi Australia mai iha Timor-Leste ho Aviaun VH-CNH ba perfurasaun mina posu Lafaek, ne’ebé lokaliza iha suku Labarai, postu administrativu Suai, munisípiu Covalima.
Notísia Relevante: Setembru, Timor Resources sei halo perfurasaun posu Lafaek iha Suai
“Ohin materiál radiativu aviaun VH-CNH to’o ona iha Covalima, mai atu hala’o perfurasaun posu Lafaek ne’ebé mak oras ne’e daudaun la’o hela,” Jerente Timor Resources, Filomeno Andrade, hateten jornalista sira iha Aeroportu Comandante-Em Chefe Das Falintil Kay Rala Xanana Gusmão, iha Covalima.
Razaun transporta materiál radiativu ne’e atu ajuda hala’o servisu perfurasaun iha semana ida tuir mai ekipamentu ekskluzivu sei to’o mai tan hodi hala’o perfurasaun.
Kompañia kontinua hatun materiál radiativu tanba ema hotu hatene programa perfurasaun hala’o besik loron 10 ne’ebé halo perfurasaun metru 500-resin ona, ne’ebé tau ona simentu ne’ebé halo perfurasaun to’o ona rai okos.
Perfurasaun posu Lafaek ne’e, kompañia sei halo perfurasaun to’o metru 1000-resin mak foin para, maibé depende bainhira problema ruma iha rai okos iha fatuk boot entaun tenke uza explosivu hodi loke dalan, nune’e bele kontinua halo perfurasaun.
Kompañia sei halo perfurasaun to’o metru 3.500 maibé agora daudaun halo perfurasaun durante loron 10 foin tun ba rai okos metru 500-resin atu tama ona ba metru 600.
Jornalista : Celestina Teles
Editór : Cancio Ximenes
