DILI, 17 outubru 2022 (TATOLI)-Ministériu Edukasaun Juventude no Desportu (MEJD) liuhosi Diresaun Servisu Edukasaun Dili (DSED) identifika ona estudante na’in 10 maka utiliza diploma falsa hodi asesu ba edukasaun nivel Ensinu Sekundáriu Jerál (ESJ).
Diretór Servisu Edukasaun Dili, Carlito da Silva, hateten estudante sira ne’e durante tinan tolu partisipa iha prosesu ensinu aprendizajen iha nivel ESJ ne’e kontinua sira nia eskola ho de’it diploma falsa ne’ebé mai-hosi ensinu báziku terseiru siklu nian ne’ebé halo hosi ema balun.
Nia dehan parte eskola apreende ona diploma falsa, agora iha hotu Edukasaun Munisípiu Dili nia liman. Diploma sira ne’e parte edukasaun identifika kuaze mai hosi eskola ensinu sekundáriu jerál sira maibé barak liu maka hosi eskola (….).
“Ita iha estudante na’in 10 maka identifikadu ona, agora ita hamutuk ho estudante na’in 10 ne’e halo ona deklarasaun, tanba estudante sira ne’e informa ona mai ita, diploma sira ne’e sira hetan hosi ne’ebé, agora hein de’it tempu atu prosesa”, Carlito da Silva hateten ba jornalista sira iha ninia knaar fatin Komoro, segunda ne’e.
Nia haktuir estudante na’in 10 ne’e deklara sira halo diploma falsa ne’e tanba hakarak hetan diploma ESJ orijinál. Ne’ebé sira hatama $60 kada ema ida ba eskola balun, ne’ebé diretór ne’e lakohi temi naran.
“Sira na’in 10 metin ona ho sira nia diploma inklui ho sira nia esplikasaun no deklarasaun ne’ebé klaru loos. Sira tama ona iha ita-nia verifikasaun. Agora estudante sira seluk retira hotu, maibé atu halai to’o iha ne’ebé, se sira hakarak hetan diploma orijinál sira sei mai tuir ezame”, tenik nia.
Diretór Carlito haktuir estudante sira ne’ebé to’o agora seidauk hatama diploma, sira nafatin hetan direitu tuir ezame, tanba kompleta ona tinan tolu sai estudante iha ensinu sekundáriu maibé bainhira atu mai foti sira nia diploma mós sira tenke submete uluk diploma orijinál, se sira laiha diploma orijinál sira sei la hetan diploma ensinu sekundáriu.
“Se sira la hatama, entaun ita sei rezolve lai, tanba ne’e direitu. Maibé tuir lei, dokumentu sira ne’e hetan hosi ne’ebé atu ita bele prosesa tuir lei. Ho nune’e maka ita bele evita sasán sira ne’e”, afirma.
Nia dehan tan, haruka ona karta ofisiál ba diretór jerál edukasaun ensinu atu haree asuntu ne’e, tanba kazu sira ne’ebé akontese daudaun mai-hosi manorin sira balun hosi eskola públiku, ne’ebé medida saida mak tenke halo presiza hetan orientasaun hosi ministériu.
Notísia relevante: Eis Diretór konklui ona asina diploma estudante finalista
Jornalista : Tomé Amado
Editora : Rita Almeida
