iklan

NASIONÁL, POLÍTIKA

Konsellu Asesoria Internasionál CNC enkontru ho PR Horta diskute kona-ba rekonsiliasaun

Konsellu Asesoria Internasionál CNC enkontru ho PR Horta diskute kona-ba rekonsiliasaun

Prezidente Republika, Jose Ramos-Horta,hala’o enkontru ho Konsellu Asesoria Internasional CNC, I.P iha Palásiu Prezidente Nicolau Lobato, Bairru Pité, Dili, kuarta (26/10). Imajen Tatoli/Egas Cristovão.

DILI, 26 outubru 2022 (TATOLI)—Diretór ezekutivu Centro Nacional Chega (CNC), Hugo Maria Fernandes hateten, Konsellu Asesoria Internasionál CNC hala’o enkontru kortejia ho Prezidente Repúblika, José Ramos Horta, hodi dsikute kona-ba rekonsiliasaun iha Timor-Leste.

“Ohin, CNC hamutuk ho Konsellu Asesoria internasionál na’in haat mak Pat Walsh, Galuh Wandita, David Webster, Akihisa Matsuno no Gus Miclata, halo enkontru kortejia ho Prezidente Republika hodi atualiza servisu sira-ne’ebé CNC halo no mós rona orientasaun ruma ne’ebé maihosi Prezidente Repúblika liuliu inisiativa ne’ebé PR hanoin atu halo iha aspetu rekonsiliasaun,” Diretór CNC hateten hafoin hala’o enkontru ho Xefe Estadu, iha Palásiu Prezidensiál, Nicolau Lobato, Bairru Pite, kuarta ne’e.

Membru Konsellu Asesoria Internasionál CNC, Galuh Wandita, hateten rekonstrusaun Timor-Leste iha área lia-loos, justisa no rekonsiliasaun ne’e importante.

“Ami foin iha diskusaun produtivu ho Prezidente José Ramos Horta. Iha sorumutu ne’e ami ko’alia liu kona-ba papél importante CNC nian hodi kontinua fó kontribuisaun ba prosesu rekonstrusaun Timor-Leste iha área lia-loos, justisa no rekonsiliasaun. Ami louva servisu CNC nian, liu-liu ho inisiativa sira kona-ba rekuperasaun ho vítima sira iha pasadu. Ami hatene katak iha inísiu kedas CNC halo servisu di’ak, hanesan foin lalais ami vizita vítima sira iha Maubara-Liquiça, ami haree inisiativa balun ne’ebé CNC foin hahú,” Galuh dehan.

Konsellu Asesoria Internasionál CNC ko’alia barak ba Prezidente Repúblika kona-ba PR nia inisiativa sira liu-liu asuntu rekonsiliasaun no koko atu hetan pontu ida-ne’e hodi lori rekonsiliasaun, la’ós de’it ho ema sira-ne’ebé iha rai-laran maibé mós ho sira-ne’ebé iha rai-li’ur no sei hela iha Indonézia,” nia hateten.

Lia-loos importante tebes iha sosiedade nia leet, nune’e Prezidente Repúblika hakarak atu buka dalan oinsá bele garante katak iha fatin balun povu Timor bele iha unidade liuhosi istória ida-ne’e.

“Ami mós ko’alia kona-ba dezafiu rekonsiliasaun internál. Nasaun ne’e la’o hela iha kooperasaun ho nasaun sira seluk. Timor-Leste iha papél no kooperasaun ho ajénsia nasionál no internasionál tan ne’e Timor-Leste sai hanesan ezemplu importante tebes ba rekonsiliasaun iha pos-konflitu, ba mundu,” nia dehan.

Membru Konsellu Asesoria Internasionál CNC, Patrik Ernest Wals, hateten CNC ne’ebé atu promove rekonsiliasaun ho Indonézia ne’e, nia fiar katak karik iha liu lia-loos kompletu kona-ba sira-nia esperiénsia Timor-Leste nian, relasaun entre Timor-Leste no Indonézia sei iha transformasaun oioin.

“Tan ne’e, ha’u aproveita oportunidade ne’e hodi dehan katak komarka ne’e bele duni ko’alia kona-ba buat seluk tan, la’ós de’it simu osan,” nia dehan.

Iha enkontru ne’e, Xefe Estadu apresia servisu sira-ne’ebé CNC halo no PR hatudu nia komprioisu atu kontinua fó apoiu.

“Ohin Prezidente hatudu nia inisiativa rasik liu-liu ba rekonsiliasaun nian, nia husu oinsá mak CNC bele ajuda iha prosesu ida-ne’e, entaun ohin mós ami simu Prezidente nia hanoin ne’e. Ho ne’e ami sei presiza halo diskusaun saida mak ami atu halo para oinsá tulun Prezidente iha asuntu rekonsiliasaun,” nia dehan.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!