BOBONAERO, 11 novembru 2022 (TATOLI) – Komunidade sira preukupa ho rai-halai rezulta estrada iha área Galusapulu, suku Lahomea, postu administrativu Maliana, munisípiu Bobonaro ne’ebé ameasa atu kotu hafoin udan-boot akontese iha semana kotuk to’o kinta ne’e.
Abitante suku Raifun, Duarte Fernando, haktuir kondisaun estrada refere la’ós foin mak hetan ameasa, maibé iha tinan kotuk mós konsege hetan estragu bainhira udan monu rai hodi difikulta movimentasaun tarnsporte hosi diresaun kapitál Maliana ba postu administrativu Bobonaro, Lolotoe to’o munisípiu Covalima.
Notísia relevante: MOP presiza buka empreza kualidade kaer projetu estrada urbana Maliana
“Ami komunidade ne’ebé halo viajen ba-mai Bobonaro, Maliana sente triste, tanba foin mak udan de’it rai halai tiha hanesan ne’e, depois ida udan mai maka’as ne’e halo nusá tán. Ne’e estrada sira-ne’e konserteza monu hotu kedas, ami halo viajen ba-mai hosi Bobonaro mai maliana di’ak ona bele mosu deskontente mai ami,” nia informa ba jornalista sira iha Galusapulu, sesta ne’e.
Nia dehan, daudaun ne’e iha kompañia lokál ida mak halo hela instalasaun gabiaun no dreinazen, maibé seidauk hotu natureza hahú sobu estraga ona.
“Ha’u husu ba estadu, karik bele, fó ba kompañia atu mai halo estrada, ko’alia uluk ba rai na’in-sira, matebian sira-ne’ebé maka iha momentu 1975 mate iha-ne’e. Sira fó-haan tiha nune’e estrada ne’e labele aat, sé sira mai naran halo de’it, ne’e kontinua aat beibeik, tanba estrada ne’e tinan-tinan halo hela de’it, maibé to’o udan mai sempre monu,” abitante hosi suku Raifun ne’e halo previzaun.
Motorista kamioneta hosi Marobo, suku Ilat-Laun, Olímpio de Araújo da Cruz, ezije ba parte kompetente atu orienta Institutu Jestaun no Ekipamentu, Institutu Públiku (IGE,I.P sigla portugés) atu mai halo normalizasaun imediata.
Tuir nia, kuandu la halo intervensaun ho urjénsia entaun akontese udan-boot loron ida ka rua tán estrada refere bele kotu totál tanba aliserse rai nian la metin ona.
“Ami sente araska oituan, ezemplu ami atu lori ema nia ra-henek, bataku ba iha Bobonaro sente araska oituan tanba kondisaun dalan hanesan, ne’ebé ami husu ba Governu tau atensaun ba estrada ne’e, atu ami povu ne’e bele hala’o atividade ho di’ak,” nia hateten.
Tuir observasaun Jornalista Tatoli iha terrrenu nota katak, dreinajen no gabiaun ne’ebé kompañia sira instala hela mós hetan estragu tanba fatuk nakfera hotu hosi estrada ne’e parte kraik no leten, maibé provizoriumente transporte públiku no privada bele halo movimentasaun tuir estrada ninin parte foho nian.
Entretantu iha fulan hirak liubá Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika, Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06. Enkuantu estrada urbana Maliana pakote II, estrada prinsipál ho estimasaun valór globál $23,587.019,36.
Notísia relevante: CAFI sei aprova estrada urbana Maliana ho kilómetru 23
Jornalista : Sérgio da Cruz
Editór : Evaristo Soares Martins
