iklan

DILI, POLÍTIKA

Lere apoiu polítika Estadu promove rekonsiliasaun ho timoroan iha Timor Osidentál

Lere apoiu polítika Estadu promove rekonsiliasaun ho timoroan iha Timor Osidentál

Tenente Jenerál Reformadu, Tito da Costa Cristóvão "Lere Anan Timur". Imajen Tatoli/Francisco Sony.

DILI, 06 dezembru 2022 (TATOLI)—Líder Istóriku no Tenente Jenerál Reformadu, Lere Anan Timur, apoiu polítika Estadu liuhosi Prezidente Repúblika ne’e promove rekonsiliasaun entre timoroan sira iha Timor-Leste ho timoroan sira iha Timor Osidentál-Indonézia.

Notísia Relevante: PR Horta: tempu ona hatudu Timor-Leste nia onestidade kona-ba rekonsiliasaun

“Rekonsiliasaun tanba ita sai hosi konflitu ida ita ho ita oho malu no hakanek malu, agora ita tenke rekonsilia malu. Ezemplu, ita-nia maluk timoroan sira-ne’ebé agora iha sorin (Timor Osidentál), sira ba ne’ebá ne’e tanba konsekuénsia hosi funu ida,” Lidér Rezisténsia ne’e hateten ba Agência Tatoli liuhosi programa “Entrevista Eskluziva” ho tópiku “Reflesaun Loron Invazaun 07 Dezembru 1975” ba dala-47 iha estúdiu Agência Tatoli, Faról, tersa ne’e.

Nia parte apoiu tanba rekonsialiasaun ne’e iha tinan barak liubá hala’o ona no atuál Prezidente Repúblika, José Ramos Horta, ho inisiativa oinsá atu kontinua hala’o rekonsiliasaun ho timoroan sira iha Timor Osidentál-Indonézia hodi hametin liután  pás no armonia.

“Tanba ne’e, hanoin ita presiza rekonsiliasaun. Sira balun uluk lakohi ukun an iha Timor maibé iha ne’e, nia tenke Timor duni. Ita-nia konstituisaun RDTL dehan sé mak sidadaun Timor iha direitu hanesan,” Lere hateten.

Notísia Relevante: Pe. Juvito: CAVR halo rekonsiliasaun envolve vítima-suspeitu atu simu malu

Líder rezisténsia ne’e hatutan, tenke halo rekonsiliasaun duni labele bolu malu tan dehan uluk nia mak oho timoroan pro-independénsia, uluk nia mau-huu, entaun ho ida-ne’e mak halo rekonsialiasaun maibé mós presiza justisa.

“Hanoin rekonsiliasaun ita iha ona, presiza mós justisa,” nia dehan.

Lere konsidera rekonsiliasaun iha nivél mundiál dalaruma Timor-Leste diferensa liu tanba depois funu la kle’ur Timor-Leste rekonsilia ho Indonézia, ho jenerál sira, no rekonsiliasaun ne’e uluk kedas la’o hela maibé justisa mos tenke la’o.

“Rekonsiliasaun la signifika ita atu bolu kedas (sira iha Timor Osidentál) aban ka bainhira sira mai Timor. Ne’ebé, hanoin naran ita haree malu di’ak, bele mai vizita nia família, knua, keta iha uma lisan ruma mai tunu manu ruma iha ne’e, hanoin problema laiha. Ida-ne’e mak rekonsiliasaun ne’e. Agora sira mai mak ita duni sira no ita oho, hanoin ida-ne’e la’ós rekonsiliasaun,” Lere esplika.

Karik rekonsialiasaun ne’e bele loke fali knek pasadu nian, líder rezisténsia ne’e hatán, ida-ne’e lae ema hotu kontente Timor-Leste ukun rasik an ona.

“Ha’u hanoin, iha Timor ita hotu mate ba funu maibé ha’u bele dehan ha’u-nia família mate liu karik, balun iha uma-kain ida iha na’in-tolu (4) ka haat (4) to’o 10 mak mate. Maibé, ida-ne’e, ha’u-nia família mate liu ida-ne’e no ha’u kontente tanba ita ukun an, tanba sira-nia mate,” nia hateten.

Notísia Relevante: PN apoiu Horta halo rekonsiliasaun ho timoroan iha Timor Osidentál no TL

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!