DILI, 14 dezembru 2022 (TATOLI)—Soru-na’in hosi munisípiu Bobonaro, Milena do Santos, hateten menus kabas difikulta grupu soru-na’in Bobonaro nia atividade atu soru tais.
Notísia Relevante: SEAK apoiu ona grupu soru tais 37 iha 2022
“Ami iha Bobonaro, ami soru tais maibé dezáfiu ami-nia mak kabas. Tanba oan sira ikus ne’e eskola hotu, hanesan oan mane sira no aman sira halo toos, sira-nia destinu to’o nune’e toos la halo, entaun kabas ne’e menus mai ami. Tanba oan mane sira foku liu ba eskola, sira haree mak eskola, toos la halo entaun ida-ne’e mak sai ami-nia preokupasaun,” Milena do Santos hateten ba Âgência TATOLI, bainhira halo espozisaun tais iha Sentru Konvensaun Dili (CCD, sigla portugés), kuarta ne’e.
Maske nune’e, tanba hadomi atividade soru tais entaun nia parte tenta kuda algudaun maske la to’o atu responde nesesidade soru tais nian, nune’e bele lori tais ne’e faan iha Dili ka munizípiu seluk.
“Ami soru lori mai faan iha Dili, depois mak hetan osan uitoan ne’e ami ba haree ema-ne’ebé kabas barak ami sosa tuir fila-fali. Aleinde ne’e sosa mós kabas hosi loja tanba haree ba toos algudaun laiha ona, ami tenke ba sosa iha loja no agora ami kuda algudaun mós ladún barak, entaum ami sosa iha loja de’it,” nia dehan.
Tais ne’ebé sira prodús hodi faan iha tipu rua (2) hanesan tais ho modelu lima (5) nu’udar tais tradisionál no ida seluk tais ne’ebé sira apreende bainhira envolve an iha grupu ne’ebé organiza hosi Fundasaun Alola no Timor Aid.
“Modelu tais iha oin lima (5) hanesan tais feto bodato, tais mane sabu no apiden no mós tais mane kdelen, nune’e bainhira ami tuir fali grupu ne’e mak ami hetan tan kór pink, matak, ajúl, xokolate no kinur,” nia esplika.
Soru-na’in ne’e hateten, nia parte hahú soru tais hahú iha tinan 12 to’o agora, ne’ebé daudaun nia envolve ona iha grupu soru tais ninian ne’ebé organiza hosi Fundasaun Alola no Timor Aid.
“Ha’u soru desde kedan ha’u iha idade 12 to’o agora, nune’e ha’u hatene tiha soru mak forma grupu ho naran “Feto Buka Rasik”. Grupu ne’e, forma hosi Timor Aid no Fundasun Alola tanba Timor Aid mak hari’i grupu iha ne’ebá depois ami hetan kór oioin ne’e hosi sira,” soru-na’in ne’e hateten.
Bainhira Timor-Leste ne’ebé selebra loron nasionál tais iha 14 dezembru 2022 ne’e, nia sente kontente tanba ho atividade ne’e bele promove ona bei-ala sira-nia liman fatin ba jerasaun foun sira liuhosi tais sira-ne’ebé grupu soru tais sira soru.
“Ha’u sente kontente, tanba avó sira-nia matenek la lakon ona to’o ohin loron ba oin, avó sira-nia matenek no esperiénsia ne’ebé bei-ala sira-nian ne’e furak ba oin no moris nafatin hosi jerasaun ba jerasaun,” nia dehan.
Entretantu, tais ne’ebé sira faan iha espozisaun refere ho folin la hanesan, ezemplu hanesan tais tradisionál ho nia folin $250, tais ne’ebé kór foun $150 no $80 no selendang $25 to’o $30.
Jornalista : Nelia Fernandes
Editór : Cancio Ximenes
