CNE sei hala’o edukasaun sívika iha diáspora

DILI, 16 dezembru 2022 (TATOLI)— rezidente Komisaun Nasionál Eleisaun (CNE, siglá portugés), José Agostinho da Costa Belo, hateten tuir planu CNE sei hala’o edukasaun sívika kona-ba eleisaun parlamentár ba timoroan sira iha diáspora.

Notísia Relevante: CNE-STAE atualiza preparativu eleisaun parlamentár 2023 ba PR Horta

“Planu ba tinan oin tama ona iha programa CNE nian. Planu ba oin sei iha, ba ita-nia maluk sira liliu joven sira agora iha Portugál, Inglaterra no sira seluk hodi hala’o edukasaun sívika,” Prezidente CNE, José Agostinho da Costa Belo, hateten ba jornalista sira hafoin ramata enkontru ho Xefe Estadu José Ramos Horta iha Palásiu Prezidensiál Nicolau Lobato, Bairru Pite, sesta ne’e.

Daudaun ne’e, CNE hala’o diskusaun ho Sekeretáriu Tékniku Administrasaun Eleitorál (STAE), nune’e iha prosesu ne’e STAE mós bele hala’o resensiamentu ba sidadaun timoroan sira iha diáspora.

“Agora ita ko’alia hela ho STAE no diskusaun tékniku ba sira-ne’ebé la konsege reajusta sira-nia dadus ne’e ita presiza atende,” nia dehan.

CNE mós hala’o ona edukasaun sívika iha teritóriu no mós ba liu joven sira-ne’ebé agora formasaun iha Baucau atu ba Korea, oinsá sira-nia partisipasaun iha eleisaun mai tanba sira-nia votu ida determina hanesan nasionalidade timoroan ba nasionalizmu ne’ebé sira iha responsabilidade.

Edukasaun sívika ne’e, CNE sei esplika kona-ba prosesu eleisaun hodi aumenta koñesimentu eleitór sira-nian iha eleisaun parlamentár 2023 no nu’udar  sidadaun oinsá kontribui ba prosesu demokrátiku ne’e.

Notísia Relevante: CNE halo edukasaun sívika kona-ba eleisaun parlamentár ba abitante Macadique

Posibilidade sei labele realiza eleisaun iha Indonézia

Iha parte seluk, Prezidente CNE ne’e, hateten posibilidade ba tinan oin sei labele realiza eleisaun iha Indonézia.

Durante sorumutu ho Xefe Estadu entre CNE ho STAE ne’e, sira ko’alia mós kestaun referredatu hala’p eleisaun iha Indonézia.

“Prezidente Repúblika haree ba tetu entermu seguransa no polítika entre nasaun rua katak iha posibilidade la’os de’it la halo eleisaun maibé iha forma seluk ne’ebé bele hetan konkordánsia, ita bele maibé depende ba Parlamentu Nasionál halo mudansa lei tanba ita presiza serbisu ho baze,” nia hateten.

Diretór Jerál Sekretariadu Tékniku Administrasaun Eleitorál (STAE) Interinu, Leonardo Amaral, hateten saida mak fó sai katak Prezidente Repúblika rasik labele entaun tékniku tenke halo tuir.

Notísia Relevante: Orsamentu CNE millaun $10-resin aprova iha espesialidade ho votu a-favór 60

Jornalista : Nelson de Sousa

Editór       : Cancio Ximenes