DILI, 23 dezembru 2022 (TATOLI)–Ministériu Turizmu Komérsiu no Indústria (MTKI) liuhosi Inspesaun Jerál Jogu, akumula reseita hamutuk $2.764.895,29 hosi reseita konsensionál, hahú janeiru to’o novembru 2022 ba kofre Estadu.
“Inspesaun Jerál Jogu hala’o knaar iha tinan 2022, enkuantu reseita ne’ebé ami rekolla hahú janeiru to’o novembru 2022. Reseita ne’ebé rekolla mai hosi atividade jogu tradisionál hanesan bola guling no jogu sira seluk hanesan slot mákina, toto bola no lotaria ne’ebé daudaun legaliza,” Inspetór Jerál Jogu, Domingos da Costa Guterres, hateten ba Agência Tatoli iha ninia knaar fatin, sesta ne’e.
Hosi jogu tradisionál bola guling konsege rekolla reseita hamutuk $455.850 hosi janeiru to’o novembru 2022.
“Jogu sira ne’ebé hatama reseita boot liu maka slot mákina rua iha Dili tanba sira-nia kliente ema estranjeiru mós barak, tuir mai mak bola guling,” nia akresenta.
Notísia relevante: Feira 28 novembru: stand bola guling selu taxa $900 ba Estadu
Inspetór Jerál Jogu dehan, tuir loloos jogu tradisionál barak maibé daudaun Inspesaun Jerál Jogu legaliza foin mak bola guling de’it.
“Reseita bola guling iha janeiru sa’e maka’as, ne’e tanba seidauk suspende jogu bola guling sira iha mate uma maibé tanba ami haree sira loke jogu ne’e ladún disiplina, entaun iha marsu to’o mai agora ami suspende provizóriu,” nia esplika.
Jogu bola guling daudaun ne’e loke de’it iha stand permanente sira no iha feira sira iha loron nasionál.
Stand permanente bola guling iha Dili mak iha Comoro, Hudi-laran, Bairu-Pité iha rua, Audian, Kuluhun, Bemori, Becora iha rua, no iha Formosa, inklui stand ida iha munisípiu Viqueque no Bobonaro.
“Governu legaliza ona jogu bola guling no loke permanente, maibé Governu rekomenda atu sira joga iha uma-laran ka prepara fatin própriu,” Domingos da Costa, tenik.
Jornalista : Antónia Gusmão
Editora : Julia Chatarina
