DILI, 27 dezembru 2022 (TATOLI)–Asosiasaun Emprezariál Feto Timor-Leste (AEMTL, sigla portugés), tersa ne’e, realiza asembleia jerál ba da-IV hodi diskute estatutu no rejimentu interna, inklui hili estrutura foun.
“Loloos asembleia jerál ne’e realiza kada tinan-haat maibé tanba ho situasaun COVID-19, entaun la konsege realiza iha tinan kotuk (2021), maibé asembleia prodús rezolusaun ida hodi estende mandatu ba tinan-ida, nune’e iha agora tinan-ida to’o ona, entaun tenke realiza asembleia hodi hili estrutura foun,” Prezidente AEMTL, Hergui Luina Alves, hateten iha ámbitu Asembleia AEMTL ba da-IV, iha restaurante Ocean View, Bebonuk, tersa ne’e.
Notísia relevante: Membru AEMTL investe iha transporte fronteira terrestre ho valór $360.000
Nia dehan, atinjimente sira ne’ebé estrutura atuál halo durante mandatu nu’udar guiaun ba AEMTL ne’ebé harii liuhosi planu estratéjiku asosiasaun tinan 2017-2022, ne’ebé hosi planu estratéjiku ne’e konsege 89% hosi road map ne’ebé dezeña ona atu implementa objetivu lima, hanesan reforsa instituisaun, empodera membru no dezenvolve negósiu, asesu merkadu nasionál no internasionál, konsolidasaun ho grupu, ikus liu relasaun interna no esterna hodi sai parseiru konfiável.
“Buat sira ne’e mak ami konsege atinje, entaun bainhira mandatu ne’e hahú ami hahú ho zero katak laiha komputadór ida, laiha eskritóriu, seidauk rejistu legalmente iha Notariadu maibé iha de’it lisensa hosi Sekretariadu Estadu Formasaun Profisionál no Empregu (SEFOPE), entaun ami konsege legaliza duni nu’udar instituisaun ida no agora ami iha ekipamentu kompletu, ho apoia hosi Kámara Komérsiu Indústria Timor-Leste (CCI-TL, sigla portugés) konsege iha sede ida no sentru treinamentu,” nia tenik.
Membru AEMTL mai hosi fundadór 50, iha na’in-40 mak ativu, no daudaun iha ona membru 200 resin.
Prezidente AEMTL konfesa katak durante mandatu dezafiu boot liu maka rekursu finanseira tanba hanesan organizasaun naun lukrutivu, tanba ne’e tenke depende ba kontribuisaun membru no apoia hosi doadór.
Iha biban ne’e, emprezária feto timor-oan ne’e dehan, nia la re-kandidata ona tanba fó oportunidade ba maluk feto seluk.
“Hafoin kontribui iha mandatu ne’e, ha’u hateten, atu haforsa feto sira-nia negósiu ita tenke envolve sira iha negósiu. Entaun empoderamentu harii instituisaun ami harii metin ona, agora tempu para ami organiza liu fali negósiu, entaun ha’u labele kontinua hanesan estrutura AEMTL tanba bainhira ha’u hanesan estrutura maka ha’u halo negósiu ruma ne’e sei iha konflitu enterese, entaun ha’u sei hakiduk hosi estrutura no sei organiza filafali hodi empodera ha’u-nia maluk feto sira liuhosi atividade negósiu,” nia salienta.
Maski nune’e, membru AEMTL barak mak ejize atu Prezidente atuál kontinua ka re-kandidata maibé nia iha direitu prerogativu individuál hodi deside.
Jornalista : Antónia Gusmão
Editora : Julia Chatarina
