DILI, 28 dezembru 2022 (TATOLI)— Portavós Komandu Jerál PNTL, Superintendente Xefe Arnaldo Araújo, rejeita informasaun ne’ebé espalla iha rede sosiál katak membru PNTL Bobonaro halo agresaun fíziku hasoru labarik minioridade ida to’o kanek grave.
“Tuir relatóriu ne’ebé mak Komandu PNTL Bobonaro submete mai ne’e katak sidadaun ka alin ne’e halai maka monu mesak, nune’e infomasaun ne’ebé espalla iha rede sosiál ne’e la laloos”, Portavós PNTL ne’e hateten ba Jornalista sira iha Kuartél Jerál PNTL, Caicoli, kuarta ne’e.
Nune’e, Portavós ne’e lamenta tanba iha sidadaun balun koko so’e informasaun falsu iha rede sosiál katak deskonfia membru PNTTL halo agresaun fíziku hasoru labarik iha Maliana baihira tun halo atuasaun iha área Santa Cruz, postu administrasaun Maliana.
“Ha’u hakarak fó hateten ba iha públiku katak iha ema balun lansa informsaun falsu iha rede sosiál kona-ba akontesimentu iha Maliana, Komandu PNTL Munisipiu Bobonaro identifika ona ema ida ne’e no tempu badak sei bolu nia atu foti nian deklarasaun”, nia afirma.
Iha biban hanesan, Komandante Polisia Nasionál Timor-Leste (PNTL) MunisÍpiu Bobonaro, Superintendente Antoninho Mau-Luta, hateten nia parte seidauk bele ko’alia katak nia-membru mak halo duni agresaun fíziku ba sidadaun minioridade to’o rezulta kanek grave hanesan públika iha rede sosiál, nune’e presiza duni halo investigasaun hodi bele deskobre nia verdade.
“Kona- bá ida ne’e, ha’u labele hateten katak, ha’u nia membru sira halo agresaun fiziku, maibé depois maka ita haree iha prosesu, tanba iha prosesu mak hatudu ha’u-nia membru halo agresaun fíziku ka la’e”, Komandante PNTL Munisípiu Bobonaro Superintendente Antoninho Mau-Luta informa ba jornalista sira iha Komandu Jerál PNTL Caicoli, kuarta ne’e.
Komandante Mau-Luta konta iha 27 dezembru kalan, simu duni kontaktu hosi Amu Párokia Santa Kruza Maliana, katak kuaze tempu kalan labarik sira sunu fugete hodi halo Amu no Madre sira sente ladun di’ak bainhira kalan atu deskansa.
Ho situasaun ne’e, Komandante Mauluta orienta kedan membru sira ho karreta hala’o patrulla ba fatin refere hodi prevene situasaun ne’e.
“Bainhira membru sira to’o iha fatin, ita nia alin na’in hira ne’e haree, hafoin sira haree ida halai sa’e, ida halai tesik, maka tuir informasaun ne’ebé ha’u simu daudaun liuhosi WhatsApp dehan katak, alin ne’e nia halai, nia mak monu rasik, mak baku aan bá fatuk. Nune’e laiha polísia ida mak halo agresaun fíziku”, hateten komandante Mauluta.
Nia afirma, alin-oan ne’ebé monu daudaun ne’e halo ona tratamentu iha óspitál Maliana, maibé hosi familia sira deskontente no apresenta keixa tán no sira dehan katak iha ne’ebá sira oan no alin hetan baku hosi polísia iha nia kotuk laran. Maibé realidade la’e no laiha.
“Ha’u orienta Xefe Departementu Justisa Komandu PNTL munisípiu Bobonaro atu halo akompañametu ba alin ne’e iha ospitál Maliana hodi halo Check Up ka atestadu médiku ba nia saúde liuliu iha nia kotuk laran atu hatudu katak ne’e kanek kauza hosi agresaun fíziku hosi membru sira,” katak nia.
Daudaun ne’e, PNTL Bobonaro halo ona identifikasaun no investigasaun ba sidadaun ida ho insiál J no S seidauk tanba nia sei halo tratamentu iha óspitál.
Komandante ne’e afirma halo ona identifikasaun ba sidadaun ne’ebé públika informasaun iha rede sosiál katak membru komandu PNTL munisipiu Bobonaro halo agresaun fíziku, nune’e tempu badak sei bolu nia hodi presta nia deklarasaun kona-ba kazu ne’e.
“Ita hetan ona ema ne’ebé públika informaun falsu ne’e iha rede sosiál no ita kontaktu ona atu nia tenke ba aprezenta nia-aan ba iha komandu. Tanba iha ne’ebá nia hateten ha’u iha mídia sosiál dehan katak Komandante Polísia munisipiu Bobonaro ne’e toba dukur, ida ne’e maka ita atu buka tuir para bolu nia mai deklara nia-aan, nia hatene katak ha’u nu’udar Komandante ne’e toba dukur ne’e iha ne’ebé”, nia lamenta.
Jornalista: Natalino Costa
Editór : Florencio Miranda Ximenes
