Loke Kasino iha Covalima sei fó risku kazu abuzu seksuál sa’e
COVALIMA, 05 janeiru 2023 (TATOLI)—Eis Prezidente Asosiasaun Covalima, Amelia de Jesus Amarál, hateten loke jogu Kasino iha Covalima ne’e sei fó risku ba númeru kazu abuzu seksuál sa’e no fó ameasa ba família sei naksobu barak.
Notísia Relevante: Sidadaun estranjeiru ida halo abuzu seksuál ba menór iha Covalima
“Loke jogu Kasino fó risku ba númeru kazu abuzu seksuál komesa sa’e no fó ameasa família sei naksobu barak, sei akontese tráfiku umanu no sei akontese mós prostituisaun. Hakarak ka lakohi tipu kazu tolu ida-ne’e sei akontese iha ita-nia munisípiu,” Amelia de jesus Amarál hateten ba jornalista sira, iha Santa Rosa, kinta ne’e.
Razaun tipu kazu tolu rejista aas iha Covalima tanba prosesu reabilitasaun Gedung Wanita seidauk finaliza, maibé PNTL-VPU hahú rejista ona tipu kazu abuzu seksuál hasoru labarik feto ho idade menór, hafoin reabilita Gedung Wanita hanesan fatin atu loke Kasino.
“Ho nune’e, nu’udar feto potensiál no inan, nia impaktu ita-hahú hasoru daudaun ona. Maske reabilitasaun la’o hela maibé kazu abuzu seksuál ba feto ho labarik hahú akontese daudaun ona. Lahatene, bainhira loke tan Kasino, ita lahatene saida mak atu akontese tan,” nia dehan.
Tanba ne’e, bainhira loke Kasino iha munisípiu Covalima mak atividade jogu ne’e sei fó impaktu ba feto ho labarik sira atu hetan violasaun sekesuál.
PNTL-VPU nia preparasaun ba feto maluk ho labarik feto sira, liu-liu inan no aman sira, bainhira akontese kazu ruma labele nonook tanba PNTL-VPU prontu hala’o servisu durante oras 24 nia laran, nune’e lezada sira bele asesu justisa.
“Nu’udar eis prezidente asosiasaun feto, rekomenda ba feto lideransa sira, ita hamutuk luta kontra violénsia bazea ba jenéru, oinsá atu halo advokasia di’ak liután nune’e labele loke Kasino iha Covalima,” nia hateten.
Notísia Relevante: Governu laiha koñesimentu Timor Holding reabilita “Gedung Wanita” iha Suai
Maske kompañia bele halo reabilitasaun ba Gedung Wanita, maibé atu uza ba enkontru no seluk tan, ida-ne’e mós bele kontribui reseita, la’ós loke jogu Kasino de’it mak bele kontribui reseita ba Estadu tanba Gedung Wanita hanesan gedung ne’ebé feto sira atu hala’o nia atividade.
“Atu kontribui reseita ba Estadu hodi loke Kasino ne’e nia impaktu boot, tanba ita atu tau Covalima iha rai naruk. Tanba, agora daudaun ema haruka ita Covalima monu iha rai naruk nia laran, ita-na’in agora seidauk hatene maibé hakarak ka lakohi futuru sei monu ba iha rai-koak,” nia hateten.
Antes ne’e , veteran hamutuk ho joven Covalima la aseita desizaun hosi autoridade Covalima hasai nia deklarasaun bainhira kompañia Timor Holding halo reabilitasaun ba Gedung Wanita atu loke Kasino hodi kontribui reseita ba Estadu no loke kampu traballu.
Maibé sosiedade hotu iha Covalima la aseita, ho razaun katak Gedung Wanita besik edifísiu Servisu Edukasaun Munisípiu Covalima, eskola pre-eskolar, Komando PNTL munisípiu Covalima no mós rezidénsia administradór munisípiu Covalima nian.
Notísia Relevante: Joven Covalima la aseita autoridade transforma “Gedung Wanita” fatin ba jogu Kasino
Jornalista : Celestina Teles
Editór : Cancio Ximenes
