COVALIMA, 04 janeiru 2023 (TATOLI)– Xefe Investigasaun Polísia Nasionál Timor-Leste Unidade Ema Vulneravél (PNTL-VPU) Covalima, Primeiru Sarjentu Amelia de Jesus Amarál, hateten sidadaun estranjeiru ida hosi Xina ho inisiál ZYZ (idade52) halo prátika abuzu seksuál hasoru menór ho idade 16 ho insiál SdS hosi Liquiça.
Kazu abuzu seksuál ne’e akontese bainhira vítima SdS hala’o servisu domestika hanesan baby sister hodi haree suspeitu ZYZ ho nia feen iha Covalima, maibé suspeitu halo seksuál ne’e iha tuku 14h00, iha kinta (22/12/2022) no iha tuku 18h00 lezada hato’o keixa ba PNTL Covalima.
“Kazu abuzu seksuál ba menór ne’ebé akontese iha Gedung Wanita ne’e, agora daudaun prosesu haruka ona ba Ministeriu Públiku (MP) no lezada ho inisiál SdS agora daudaun hela ona iha uma mahon Salele,” Xefe Polisia VPU Covalima, Primeiru Sarjentu Amelia de Jesus Amaral hateten ba jornalista sira iha Bairru Rompe, kuarta ne’e.
Hafoin akontesementu, vítima SdS hato’o keixa ba Polisia Nasional Timor Leste (PNTL) Covalima, liuhosi Seksaun Investigasaun Kriminal no Unidade Polísia Ema Vulneravél (PNTL-VPU).
Suspeitu ne’ebé ho inisiál YZY, mai iha munisípiu Covalima atu halo reabilitasaun ba Gedung Wanita maibé reabilitasaun seidauk finaliza, suspeitu halo abuzu sekasuál ba nia baby sister.
“Suspeitu ema estranjeru, nia mak agora daudaun halo hela servisu ba obra Gedung Wanita ne’e no suspeitu ami labele detein. Hafoin halo identifikasaun, nia bele fila no Ministeriu Publiku mak bele bolu nia,” nia hateten.
Bazea ba kronólojia ne’ebé Agencia Tatoli asesu katak vítima SdS hosi munisípiu Liquiça ne’ebé mai iha Suai iha sesta (6/11/2022), nia bin haruka nia mai iha munisípiu Covalima atu servisu sai hanesan baby sister.
Daudaun ne’e, vítima asegura ona iha uma mahon Salele hodi hetan asisténsia no kontinua hein prosesu kontinuasaun ba kazu abuzu seksuál harosu nia, no kazu ne’e iha ona Ministériu Públiku Covalima ho Numeru Uniku Krimi (NUC-Sigla Portugés) 0085/22.CV.SUI.
Jornalista : Celestina Teles
Editór : Cancio Ximenes
