COVALIMA, 10 janeiru 2023 (TATOLI)–Tékniku Sentru Solidariedade Sosiál no Inkluzaun (CSSI, sigla portugés) sei kontinua hala’o levantamentu dadus ba komunidade ne’ebé enfrenta ho problema bem-star sosiál iha munisípiu Covalima.
Notísia Relevante: SSI Covalima seidauk finaliza levantamentu dadus komunidade problema bem-star sosiál
“Levantamentu dadus ba komunidade ho problema bem-star sosiál, ita hala’o iha tinan 2022 maibé tanba seidauk kompletu Ministériu Solidariedade Sosiál no Inkluzaun (MSSI) liuhosi gabinete planu iha hanoin no fó ona orientasaun ba Sentru Solidariedade Sosiál no Inkluzaun (CSSI) atu kontinua halo levantamentu dadus iha aldeia sira-ne’ebé tékniku seidauk kobre,” Diretór Sentru Solidariedade Sosiál Covalima, Agapito Asis, informa ba Agência Tatoli, iha-nia servisu fatin Suai Loro, tersa ne’e.
Iha trimestre dahuluk ne’e, diretór fó prióridade distribui ai-han nutritivu ba uma kain, inan isin-rua no sei haree mós tempu hodi kontinua halo levantamentu dadus ba komunidade ho problema bem-star sosiál.
“Ha’u hanoin levantamentu sei kontinua iha sei hahú tinan ne’e seidauk hahú iha fulan janeiru, maibé ita haree to’ok tanba haree ba menus rekursu sai problema ida ba ita,” nia hateten.
Levantamentu dadus problema bem-estar sosiál ne’e haree liu kona-ba uma kain sira-ne’ebé menus rendimentu, laiha kampu traballu, kondisaun uma ladi’ak, ema ho ddfisiénsia, inan-aman abandona labarik sira, vítima dezastre natural sei afeta problema bem-estar iha sira-nia uma laran.
Tanba Governu presiza dadus, nune’e MSSI bele hatene dadus ema na’in-hira mak enfrenta ho problema bem-star sosiál, no sé mak iha problema bem-star sosiál ne’e atu enkamiña dadus ba MSSI hodi bele foti desizaun.
Atu finaliza lavantamentu dadus ne’e, presiza tempu no rekursu maibé esforsu bainhira mak finaliza, tanba programa sira-ne’e tenke tau prióridade.
Durante ne’e, tékniku sira kobre ona postu administrativu hitu (70 iha suku 30 maibé aldeia balun seidauk kobre.
Tuir dadus, funsionáriu servisu iha Centru Solidariedade Sosiál hamutuk na’in-10-resin ne’e inklui ho tékniku sosiál iha postu administrativu hitu (7).
Notísia Relevante: SSI rejista komunidade problema bem-star sosiál provizóriu na’in-3094 iha Covalima
Jornalista : Celestina Teles
Editór : Cancio Ximenes
