DILI, 12 janeiru 2023 (TATOLI)–Vise Ministra Solidariedade Sosiál no Inkluzaun (MSSI), Signi Candrawati Verdial, hateten reklamasaun ba subsídiu fim do ano subsídiu $200 ba uma kain iha territóriu nasionál ne’e presiza iha justifikasaun forte iha terrenu mak bele aprezenta ba Konsellu Ministru (KM).
Notísia Relevante: Xefe família 28.583 iha territóriu nasionál la simu subsídiu $200
“Ita tenke halo justifikasaun forte iha terrenu kona-ba reklamasaun, nune’e MAE koordena ho MSSI mak hafoin aprezenta ba KM tanba desizaun hotu-hotu liuhosi koletivu KM. Ami-ne’e membru Governu labele halo buat ida, ami somente aprezenta de’it faktu no verifkasaun dadus hosi MAE ba KM,” Signi Candrawati Verdial, hateten ba jornalista sira hafoin fó pose ba fiskál úniku na’in-rua hosi Instituisaun HIV SIDA ho Instituisaun Nasionál Defeza Direitu ba Labarik iha salaun MSSI, Dili, kinta ne’e.
Reklamasaun barak liu maibé kona-ba dadus kompeténsia MAE nian liuhosi administradór, xefe suku sira pasa fali informasaun submete ba MAE mak MAE mai iha MSSI, depois haree nia dalan halo oinsá tanba iha dekretu-lei ida aprovadu ne’e la fó dalan atu halo prosesu reklamasaun foun.
Maibé, nia dehan, iha aldeia balun ema barak la simu maibé presiza iha justifikasaun hosi terrenu hafoin MAE koordna ho MSSI mak aprezenta ba Konsellu Ministru, desizaun hotu kabe ba KM nian tenke prezidente promulga.
Ministru Prezidénsia Konsellu Ministru, Fidélis Magalhães hateten, alterasaun legal la’ós problema ida-ne’ebé polemika liu maibé importante mak dadus númeru ema ne’e hira, ema sira-ne’e iha duni direitu ka lae entaun faze dahuluk mak MAE verifika tiha lai dadus hotu mak depois haree katak presiza halo dekretu-lei hodi sai hanesan baze legál hodi responde problema.
“Produsaun legislativa ne’e la’ós mai kompleksu, ita bele halo produs saida de’it maibé importante mak impaktu sosiál no informasaun tenke loos ka ema la inventa de’it. Se ministériu proponente hakarak atu avansa mak ita hamutuk para haree,” nia dehan.
Koordenadór Jerál Sekretariadu Tékniku Pagamentu Subsídiu Fim do Ano ba Uma kain, iha MSSI, João Coimbra, dehan pagamentu subsídiu ba uma kain iha territóriu nasionál finaliza ona iha loron 06 janeiru maibé xefe família 28.583 mak la simu subsídiu $200.
“Pagamentu Subsídiu fim do ano ita termina ona iha 06 janeiru liubá maibé uma kain ne’ebé la hetan direitu hamutuk 28.583 ne’e hosi totál xefe família hamutuk 339.954,” João Coimbra hateten.
Hosi númeru 28.583 ne’e, nia esplika, maiória la mosu iha fatin pagamentu, balun tanba naran laiha lista pagamentu ne’ebé mai entrega ba MSSI no seluk fali tanba benefisiáriu balun ho saláriu mensál $500 inklui iha xefe família ne’ebé mak mate no oan sira sei iha idade minoria hela entaun labele simu direitu ne’e .
Totál benefisiáriu iha territóriu nasionál hamutuk 339.954 ho montante osan alokadu $67.990.800.
Notísia Relevante: MSSI husu PM rezolve lista reklamante subsídiu $200
Jornalista : Osória Marques
Editór : Cancio Ximenes
