DILI, 24 janeiru 2023 (TATOLI)—Ministériu Agrikultura no Peska (MAP) liuhosi Diresaun Nasional Irrigasaun, iha tinan 2022 konsege halo kontrusaun ba irrigasaun foun boot rua.
Diretór Irrigasaun Nasionál, Martinho Laurentino Soares, hateten, irrigasaun refere halo iha postu administrativu Laivai munisípiu Lautém no iha Galata postu administrativu Venilale, munisípiu Baucau.
“Iha tinan 2022, ita halo konstrusaun ba irrigasaun boot foun rua. Nia orsamentu maihosi fundu infrastrutura no irrigasaun ba munisípiu Lautém ho nia montante milliaun $7 resin no ba Galata Baucau gasta milliaun $11 resin,” Martinho Laurentino Soares dehan ba Agência Tatoli, iha nia knaar-fatin, MAP Comoro Dili, tersa ne’e.
Nia dehan, irrigasaun iha munisípiu rua ne’e, ba Lautém sei kobre natar ektare 350 resin inklui rai sira ne’ebé dadaun abandona hela, no iha Galata Baucau bele kobre natar kuaze ektare 800 inklui mós rai ne’ebé ne’ebé sei abandonadu ne’e.
Nune’e, kona-ba atividade irrigasaun nian desde 2021 to’o 2022 ne’e iha tipu rua, mak projetu boot nia orsamentu maihosi fundu infrastrutura no ida maihosi liña ministeriál ne’ebé nia orsamentu maihosi kapitál dezenvolimentu.
“Iha 2022 ne’e, ita la halo reabilitasaun ba irrigasaun barak tanba orsamentu laiha ne’ebé atividade halo reabilitasaun ne’e orsamentu restu maihosi projetu irrigasaun ualu iha tinan 2021 nian, no maizumenus restu orsamentu hamutuk $3.000 resin ne’ebé ita halo reabilitasaun ne’e ba irrigasaun iha fatin haat hanesan, iha Bobonaro foka bai ha Loes natar Atabae nian, Ermera Atsabe, no Manufahi,” nia dehan.
Aleinde ne’e, iha mós projetu emerjénsia ida ne’ebé liga ba dezastre nian hanesan udan mota tun sobu irrigasaun sira. Ho ida ne’e, liuhosi orsamentu emerjénsia iha 2022 ne’e irrigasaun ne’ebé hetan estragu MAP rezolve kedas.
Nia dehan, Diresaun Nasional Irrigasaun nia responsabilidade mak halo reabilitasaun no konstrusaun ba irrigasaun de’it, no oinsá MAP bele fasilita komunidade halo to’os no natar iha rai produtivu sira.
Nia dehan ba planu 2023 ne’e, MAP iha propostu atu harii irrigasaun boot foun tolu ne’ebé sei kontrui iha Baucau, Bobonaro no Viqueque.
“Maibé ida ne’e ita foin hatama proposta ne’ebé sei haruka ba Ajência Dezenvolvimentu Nasional (ADN), ho haree hotu nop sei haruka ba Sekretariadu Grande Projetu para tau osan haruka fali ba Komisaun Nasional Aprovizionamentu (CAN) mak foin halo konkursu públiku. Ne’ebé nia prosesu ne’e sei kleur oituan,” Martinho hateten.
Jornalista : Arminda Fonseca
Editora : Armandina Moniz
