Gaspar propoin 04 jullu-24 setembru sai loron nasionál ba EhD
DILI, 26 janeiru 2023 (TATOLI)—Asesór Prinsipál ba Asuntu Inkluzaun Sosiál Prezidénsia Repúblika, Gaspar Afonso, hateten Ema ho Defisiénsia (EhD) sei propoin ba deputadu sira iha Parlamentu Nasionál (PN) atu hili loron 4 jullu no 24 setembru hanesan loron nasionál ba ema ho defisiénsia sira iha Timor-Leste.
“Razaun ema ho defisiénsia sira propoin loron 04 jullu no 24 setembru nu’udar loron nasionál ba Ema ho Defisiénsia (EhD) bazea ba ratifikasaun hosi Parlamentu Nasionál kona-ba adezaun ba Konvensaun direitu ema ho defisiénsia sira-nian ho unanimidade hosi deputadu sira,” nia hateten ba jornalista sira iha Palásiu Prezidensiál Nicolau Lobato, Bairru Pite.
Gaspar Afonso hateten, opsaun seluk ba loron Nasionál ema ho defisiénsia sira-nian mak loron ne’ebé Mahuno Bulerek Karathayano mate iha loron 24 fulan-setembru ne’e.
“Iha Mahuno Bulerek Karathayano ne’e dezde 1999, ema ida-ne’ebé sempre promove ema ho defisiénsia durante iha nia moris. Tan ne’e mak ema ho defisiénsia propoin loron ne’ebé nia mate hanesan loron Nasionálba ema ho defisiénsia sira-nian,” nia dehan.
Tanba ne’e, nia fó sujestaun ba deputadu sira atu deside loron ne’ebé Mahuno Bulerek Karathayano mate sai loron nasionál ba EhD, atu Parlamentu Nasionál sei deside opsaun rua ne’e tuir konsensu hosi deputadu sira.
Jornalista : Osória Marques
Editór : Cancio Ximenes
